Dunyoda koronavirusdan o‘limlar 11 foizga ko‘paydi, Kanada uchinchi to‘lqin bilan yuzlashmoqda, AQShda vaksinatsiyaga qaramay bemorlar soni ortmoqda. Koronaxabarlar

O‘tgan bir hafta ichida butun dunyoda koronavirusga chalinish bo‘yicha 4 milliontadan ortiq yangi holat aniqlandi. JSST qayd etishicha, bu undan oldingi bir haftalik ko‘rsatkichga nisbatan 5 foizga ko‘pdir. Virusdan o‘lim holatlari esa so‘nggi yetti kunda 11 foizga ko‘payib, 71 mingtaga yetdi. Umuman olganda, COVID-19 bilan bog‘liq yangi holatlar ketma-ket olti haftadan buyon o‘smoqda.

Kasallik o‘sishining eng yuqori sur’atlari Janubi-Sharqiy Osiyo (ayniqsa Hindiston)da va Tinch okeanining g‘arbiy qismidagi mintaqalarda kuzatildi. Afrika qit’asidan boshqa barcha mintaqalar o‘limlar soni oshganini ma’lum qildi, 46 foizlik eng katta o‘sish esa Janubi-Sharqiy Osiyoda yuz berdi, deyiladi JSST xabarida.

Eng ko‘p kasallanish holatlari Hindistonda (513 mingta yangi holat, o‘sish 38 foiz), Braziliya (505 ming, pasayish 5 foiz), AQSh (444 ming, +5%), Turkiya (265 ming, +43%), Fransiya (244 ming, -4%) qayd etildi.

Jami esa, JSST ma’lumotlariga qaraganda, butun dunyoda 131,4 million kishi kasallikni yuqtirib olgan va 2,8 million kishi vafot etgan. O‘tgan bir kecha-kunduzda esa 434 mingta kasallanish va 6,6 mingta o‘lim holatlari aniqlangan.

Jons Hopkins universiteti ma’lumotlari bo‘yicha, dunyoda koronavirusga chalinganlar soni 132,2 million, vafot etganlar esa 2,8 millionga yetgan. So‘nggi 24 soat mobaynida kasallanganlar 490 ming, vafot etganlar 7,4 ming kishiga ko‘paygan.

Kanadada ayni paytda koronavirusning uchinchi to‘lqini sodir bo‘lmoqda, deya ma’lum qildi mamlakat bosh vaziri Jastin Tryudo. “Butun dunyo bo‘ylab mamlakatlar ushbu pandemiyaning juda kuchli uchinchi to‘lqini bilan yuzlashmoqda. Ayni paytda shunday davlatlardan biri — Kanada”, — dedi u.

OAVlar qayd etishicha, so‘nggi bir haftadan buyon Kanadada bir kunda o‘rtacha 5,2 mingta kasallanish holatlari aniqlanmoqda, kasalxonaga yotqizish va bemorlarni intensiv davolash palatalariga o‘tkazish holatlari esa ko‘paygan.

Shu bilan birga, Kanadada 10 milliondan ortiq dozadagi koronavirusga qarshi vaksina taqsimlab bo‘lingan. Kanadaning 38 million aholisi orasida xohlovchilar sentabr oxirigacha vaksina olib bo‘ladi.

AQShda aholini emlashdagi muvaffaqiyatlarga qaramay, koronavirusning yangi mutatsiyalari tarqalishi oqibatida kasallanganlar soni ham ortib bormoqda. “AQSh pandemiya bilan kurashda finish chizig‘iga yaqin qoldi, deyishga hali erta”, — dedi AQSh prezidenti Jo Bayden. U 19-apreldan barcha voyaga yetgan AQSh fuqarolari emlanish imkoniyatiga ega bo‘lishini va’da qildi.

Shu bilan birga, o‘lim holatlari yil boshidagi ko‘rsatkichlarga nisbatan kamaymoqda, dedi Bayden. U aholini vaksinatsiya qilish sur’atlarining oshishini yaxshi yangilik sifatida keltirib o‘tdi. “Prezidentligimning ilk 100 kunida 200 millionta vaksinatsiyadan iborat bo‘lgan maqsadimni amalga oshirish yo‘lidamiz”, — dedi u.

Shuningdek:

• Avstriyada fuqarolar sartaroshxonalar va xizmat ko‘rsatish sohasidagi boshqa tashkilotlarga hamda nooziq-ovqat do‘konlariga borish uchun ko‘pi bilan 48 soat oldin topshirilgan manfiy natijali koronavirus testini taqdim etishi kerak bo‘ldi.
• Buyuk Britaniyada voyaga yetgan aholining 60 foizi koronavirusga qarshi vaksinaning birinchi dozasi bilan emlandi. Ikkita dozani ham qabul qilganlar ulushi esa 10,4 foizni tashkil qildi. Xitoyda esa aholiga 145,3 millionta vaksinatsiya qilindi.
• Britaniyada ehtimoliy xavflar haqidagi ma’lumotlar fonida Oksford universiteti AstraZeneca vaksinasini bolalar va o‘smirlarda sinashni to‘xtatdi. Britaniya regulyatori vaksina va trombozlar hosil bo‘lishi o‘rtasidagi bog‘liqlik borasida qaror qabul qilganidan keyin davom ettirilishi mumkin.