JSST ham AstraZeneca vaksinasi bilan emlash va tromb holatlari o‘rtasidagi bog‘liqlikni tasdiqladi

Jahon sog‘liqni saqlash tashkiloti (JSST) koronavirusga qarshi AstraZeneca vaksinasining samaradorligi uning zararli tomonlaridan ustun deb hisoblamoqda. Bu haqda JSSTning tartibga solish va dastlabki malakalar bo‘limi rahabari Rojerio Pinto de Sa Gaspar aytib o‘tdi, deb yozadi “RBK”.

“COVID-19’ga qarshi AstraZeneca vaksinasi bilan emlash va kamdan kam uchraydigan miya trombozi o‘rtasida bog‘liqlik mavjudligi aniq, ammo ushbu sindromning bevosita sababi hali noma’lum”, — dedi u.

JSST AstraZeneca bilan emlangan bemorlarda shunga o‘xshash asoratlar yuzaga kelayotgani haqidagi xabarlar fonida tadqiqotlarni davom ettirmoqda. Yangi tadqiqot 7 yoki 8-aprel kuni bo‘lib o‘tishi rejalashtirilgan. Ammo Gaspardning ta’kidlashicha,  JSSTning mazkur vaksinaga nisbatan fikri o‘zgarmasligi mumkin.

6-aprel kuni Yevropa dori-darmon agentligi (EMA) vakili koronavirusga qarshi AstraZeneca vaksinasi bilan emlash va qonda tromb kelib chiqishi o‘rtasidagi bog‘liqlikni tasdiqladi. “Endilikda AstraZeneca bilan emlashning tromboz keltirib chiqarishini aniq ayta olamiz. Ammo ushbu reaksiyaga nima turtki bo‘layotganini hali bilmaymiz”, — dedi EMA vakili Marko Kavaleri.

Eslatib o‘tamiz, preparat bilan emlanganlar orasida tromboz va ketma-ket sodir bo‘lgan o‘lim holatlari sababli AstraZeneca vaksinasining obro‘si tushib ketdi. Birinchi bo‘lib Avstriya davlati vaksinadan foydalanishni to‘xtatdi. Keyinchalik Germaniya, Fransiya, Italiya, Ispaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo va Janubiy Afrika mamlakatlarida mazkur vaksinadan foydalanish to‘xtatilgan.

Yevropa Dori-darmon agentligi (EMA) koronavirusga qarshi AstraZeneca vaksinasi xavfsiz va samarali deb e’lon qilgach, Yevropa davlatlari ushbu preparat bilan emlashni qayta boshladi. Shuningdek, JSST ham AstraZeneca bilan emlashda davom etishni tavsiya qildi. Xususan, Germaniya, Fransiya, Italiya, Ispaniya, Bolgariya, Portugaliya va Sloveniya, shuningdek, Kanada va Latviyada ham AstraZeneca bilan emlashni qayta boshlashga ruxsat berildi.

Biroq Norvegiya, Shvetsiya, Finlyandiya, Islandiya va Irlandiya hali ham AstraZeneca’ni qo‘llashdan bosh tortmoqda.