“Angren” erkin iqtisodiy zonasida joylashgan “Birinchi rezinotexnika zavodi” MChJ shina ishlab chiqarish zavodi quvvatining 15 foizida ishlamoqda. Bu haqda Qonunchilik palatasi spikeri o‘rinbosari, “Milliy tiklanish” partiyasi rahbari Alisher Qodirov Hisob palatasining 2020-yil uchun hisobotiga tayanib ma’lum qildi.
Uning so‘zlariga ko‘ra, rezinotexnika zavodi (Bars brendi ostida shinalar ishlab chiqaradi) omborida 100 mingta shina sotilmay turibdi. “Sababi doimgidek, sifat talabiga javob bermaydi”, — degan deputat va so‘nggi ikki yilda UzAuto Motors 60 million dollarga yaqin shina import qilganini qo‘shimcha qilgan.
“Loyiha noto‘g‘ri rejalashtirilganmi? Qarz to‘g‘ri ishlatildimi? Qarzdan kutilgan natija olindimi? Savollarga: ‘…harakatlar boshlangan, sifat sertifikatlari olinmoqda’, qabilida javob olindi. Lekin boshqa savol tug‘iladi: nimaga endi?” — degan deputat va bunday xatolar olib borilayotgan islohotlarga jiddiy zarar yetkazishini ta’kidlagan.
“Gazeta.uz”ning yozishicha, “Rezinotexnika” Sobiq Ittifoq davrida respublikadagi yirik rezinatexnika mahsulotlari ishlab chiqaruvchi bo‘lgan. Korxonaning loyihaviy quvvati yiliga yengil avtomobil va avtotirkamalar (profil 41/21) uchun 120 mingta shina, 9 million juft maxsus oyoq kiyim, 600 ming kvadrat metr rezinali mato va 1000 tonna mahsulot rezinasini ishlab chiqarishga teng bo‘lgan. Rossiyadan xomashyo yetkazib berilishi keskin tushib ketgani sababli korxona quvvati so‘nggi yillarda 5 foizdan tushib ketgan.
2013-yil dekabrida “O‘zkimyosanoat” boshlang‘ich qiymati 190 million dollar bo‘lgan qurilishga bosh pudratchi tanlash bo‘yicha tender e’lon qilgan. O‘sha yilning avgustida tender bo‘lib o‘tmagan deb topilgan. 2014-yil noyabrida “O‘zkimyosanoat” va Poly Technologies zavod qurilishiga shartnoma imzolagan. 2016-yil sentabrida Prezident Shavkat Mirziyoyev obyekt qurilishini kelib ko‘rgan.
Obyekt qurilishi 2018-yilning avgustida yakunlandi, loyihaning bosh pudratchilari esa Xitoyning Poly Technologies va Linglong kompaniyalari bo‘ldi.
2019-yilning aprelida Vazirlar Mahkamasi “Birinchi rezinatexnika zavodi”ni davlat xaridlari uchun qishloq xo‘jaligi texnikalari va avtomobil shinalarini yagona yetkazib beruvchisi etib belgiladi.
2019-yilning noyabrida O‘zbekiston va “Tatneft” “Birinchi rezinatexnika zavodi”ga egalik qiladigan qo‘shma korxona tashkil etgani ma’lum bo‘ldi. Rossiya kompaniyasi ishlab chiqarishga kamida 500 million dollar tikishi xabar qilingan.
2020-yilda Inqirozga qarshi kurash jamg‘armasi tomonidan ushbu zavodga birinchi darajali xarajatlarini qoplashga ssuda ko‘rinishida 40 milliard so‘m ajratilgan.
Izoh (0)