Spotify musiqiy striming servisi yana 85 ta yangi bozorga, jumladan, O‘zbekistonga kirishini e’lon qildi. Bu haqda kompaniya bayonotiga tayanib, Spot xabar berdi. Shuningdek, servis 36 ta yangi tilni qo‘shmoqda. Servis yaqin bir necha kun ichida ishga tushishi kutilmoqda.

Foto: Complex

“Hozirda Spotify’dan taxminan dunyoning yarim mamlakati foydalanmoqda, biroq hamon dasturdan foydalana olmayotgan millionlab yaratuvchilar va milliardlab tinglovchilar mavjud”, — deydi kompaniya bosh direktori Deniel Ek.

Yangi davlatlarda ham pulli, ham bepul rejalarga obuna bo‘lish mumkin, ayrim bozorlarda esa Spotify individual, oilaviy, ikki kishilik va talabalar tariflariga oid variantlarni taqdim etadi.

O‘zbekistonda va boshqa davlatlarda Spotify to‘liq global katalogini taqdim etadi. Shuningdek, kompaniya katalogini kengaytirish yo‘lida mahalliy mualliflik huquqi egalari va sheriklar bilan ishlash niyatida, bu mahalliy kompozitsiyalar va mualliflarni yanada ko‘proq qo‘shishga sabab bo‘ladi.

Avvalroq Spotify O‘zbekistonda soliq to‘lovchilar hisobiga turgani ma’lum bo‘lgandi. Shvetsiyaning musiqiy servisidan hozirda dunyoning 120 mamlakati foydalana oladi, uning katalogidan 50 milliondan ortiq musiqa va 4 milliard pleylist o‘rin olgan.