Koronavirusga qarshi birinchi navbatda vaksina oluvchilar ro‘yxati qayta ko‘rib chiqiladi. Bu haqda Oliy Majlis Qonunchilik palatasida bo‘lib o‘tgan yig‘ilishda ma’lum qilindi.
Foto: Innovatsion rivojlanish vazirligi
22-fevral kuni Oliy Majlis Qonunchilik palatasida o‘tkazilgan yig‘ilishda sog‘liqni saqlash vaziri o‘rinbosari Bahodir Yusupaliyevning aholini koronavirusga qarshi emlash borasida rejalashtirilayotgan ishlarga oid axboroti tinglangan.
Ta’kidlanishicha, koronavirusga qarshi birinchi navbatda vaksina oluvchilar ro‘yxati yuzasidan xalq vakillari tomonidan hukumatga bir qator takliflar berilgan. Bunga mazkur ro‘yxatga jurnalistlar, blogerlar va ommaviy axborot vositalari hamda jamoat transporti xodimlari, shuningdek, chet davlatlarda tahsil oluvchi talabalar va mehnat migrantlari ham kiritilganligining ijtimoiy tarmoqlarda qizg‘in muhokama qilinayotgani sabab bo‘lgan.
Parlament eshituvida xalq vakillari keksa va nuroniylar, ijtimoiy himoyaga muhtoj, ya’ni “Temir daftar”ga kiritilgan va nogironligi hamda surunkali kasalliklari bo‘lgan shaxslar, tibbiyot xodimlari, maktab o‘qituvchilari, maktabgacha ta’lim tashkilotlari, shuningdek, huquqni muhofaza qilish organlari xodimlarini birinchi navbatda emlash ishlarini tashkil qilish maqsadga muvofiq bo‘lar edi, degan taklifni ilgari surgan.
Xalq vakillarining hududlardagi faoliyati doirasida koronavirusga qarshi emlash ishlarining tashkil qilinish jarayonlari ustidan ham ta’sirchan parlament nazorati o‘rnatilishi aytib o‘tilgan.
Mavzuga doir: “Pulidan qat’i nazar, xalqimizga kerakli miqdorda vaksinani yetkazib, olib kelamiz” – Shavkat Mirziyoyev
Eslatib o‘tamiz, yanvar oxirlarida Nurmat Otabekov O‘zbekistonda dastlabki bosqichda 50 mingga yaqin kishi COVID-19’ga qarshi emlanishini ma’lum qilgandi. Moliya vaziri Timur Ishmetov esa 2021-yilda O‘zbekiston koronavirusga qarshi kurashish tadbirlari va vaksina sotib olish xarajatlari uchun 3 trillion so‘m ajratishini bildirgan.
