O‘zbekiston Respublikasi Prezidentining “O‘zbekiston Respublikasida muvofiqlikni baholash tizimini yanada takomillashtirish va sinov laboratoriyalari kompleksini rivojlantirish to‘g‘risida” 2019-yil 15-avgustdagi PQ 4419-sonli qaroriga muvofiq hamda Vazirlar Mahkamasining “Sinov laboratoriyalarini texnik jihatdan malakaliligini ma’qullash tartibi to‘g‘risidagi nizomni tasdiqlash haqida” 2020-yil 28-iyulda 456-sonli qarori qabul qilingan edi.
Ushbu qarorlar ijrosini ta’minlash maqsadida “O‘zbekneftgaz” AJ boshqaruvi raisining topshirig‘i bilan barcha korxonalardagi markaziy sinov laboratoriyalarini ushbu nizomga va O‘zDst ISO 17025–2019, O‘zDst 3410–2019 xalqaro hamda davlat standartlari talablaridan kelib chiqqan holda, Akkreditatsiya markazi tomonidan rasman tasdiqlashni tashkil qilish bo‘yicha ishlar amalga oshirilmoqda.
“O‘zbekneftgaz” AJ tizimida ishlab chiqarilayotgan va qayta ishlanayotgan mahsulotlarning sifat ko‘rsatkichlarini nazorat qilish bo‘yicha sinov bazalarini modernizatsiya qilish, mavjud laboratoriyalarni zarur zamonaviy uskunalar, nazorat o‘lchov asboblari va kimyoviy reaktivlar bilan ta’minlash hamda ular faoliyatini aktivlashtirish bo‘yicha 2021-yilda bajariladigan ishlar muhokama qilindi.
Xususan, Sho‘rtan neft va gazni qazib chiqarish markaziy sinov laboratoriyasiga zamonaviy asbob-uskunlari sotib olish va ularni bosqichma-bosqich jihozlash bo‘yicha tuzilgan chora-tadbirlarning bajarilish rejasi va amalga oshirish bo‘yicha olib borilayotgan ishlar muhokama qilindi.
Muborak gazni qayta ishlash zavodining markaziy sinov laboratoriyasiga zamonaviy asbob-uskunlar sotib olish hamda zavodning 50 yillik yubileyi oldidan tuzilgan tadbirlar rejasini amalga oshirish masalalari kelishib olindi.
Shu o‘rinda aytish joizki, ishlab chiqarilayotgan mahsulot davlat standartlariga muvofiqligi va ishlab chiqarishni nazorat qiladigan sinov laboratoriyalaridagi jarayonlar shaffofligini ta’minlash maqsadida mutaxassislar malakasi oshirilmoqda.
“O‘zbekneftgaz” AJ matbuot xizmati
