Farg‘ona viloyati hokimi Xayrullo Bozorov o‘zining 8 ta o‘rinbosari va 5 ta sektor rahbari bilan viloyatdagi ishsiz yoshlarni band qilish bo‘yicha tizimli ravishda kurashadi. Bu haqda 27-yanvar kuni Prezident Shavkat Mirziyoyev raisligida o‘tkazilgan yig‘ilishda so‘z yuritildi, deya xabar bermoqda “Daryo” muxbiri.

Davlat rahbarining ta’kidlashicha, Farg‘ona viloyatida 18 yoshdan 30 yoshgacha bo‘lgan 703 ming nafar yoshlarning 81 ming nafari ishsiz bo‘lib, 35 ming nafari xorijga chiqib ketgan. Hisobga olinmagan ishsiz yigit-qizlar soni 100 mingdan ziyod.

Foto: Prezident matbuot xizmati

“Birgina Oltiariqdagi 43 ming nafar yoshlardan 3,2 ming nafari ish bilan ta’minlanmagan. Ularning yarmi yoki 1,5 ming nafari tadbirkorlikka va kasb-hunar o‘rganishga qiziqish bildirgan. Misol uchun, “Zilol” mahallasidagi 52 gektar bo‘sh yerni “oborot”ga qaytarib, 211 nafar yoshlarni ish bilan ta’minlash mumkin.

Tuman bo‘yicha esa joriy yilda 300 gektar yerni foydalanishga kiritib, uzumchilik bo‘yicha yoshlar kooperatsiyasini tashkil qilish orqali kamida 1 ming nafar yoshlarni ish bilan ta’minlasa bo‘ladi. Buning uchun quduq qazib, suv chiqarishga 1 milliard so‘m subsidiya ajratish kifoya”, - dedi Prezident.

Shavkat Mirziyoyevning qo‘shimcha qilishicha, agar har bir sektor rahbari yoshlarning mahallabay balansini chiqarib, ishlarga aniq hisob-kitob va ilm bilan yondashsa, albatta, natijaga erishadi.

Avvalroq Shavkat Mirziyoyev O‘zbekistondagi 18-30 yoshlilar orasidagi rasmiy ishsizlar sonini ma’lum qilgan edi.