Bosh prokuror Nig‘matilla Yo‘ldoshev bir oy ichida hududlarda korrupsiya sabablarini o‘rganib, Korrupsiyaga qarshi kurash bo‘yicha Milliy kengash yig‘ilishini o‘tkazadi. Bu haqda 27-yanvar kuni Prezident Shavkat Mirziyoyev raisligida o‘tkazilgan yig‘ilishda aytib o‘tildi, deya xabar bermoqda “Daryo” muxbiri.
“Odamlarimizning farovon yashashi uchun suvga, ‘svet’ga shuncha qarz olindi. Ammo hamma joyda o‘g‘rilik, hamma joyda korrupsiya. Maktab, kollejlar qurilishida ham korrupsiya. Bu bog‘cha emas — 35 millionlik aholini boqish kerak.
Bosh prokuror Nig‘matilla Yo‘ldoshev bir oydan keyin Korrupsiyaga qarshi kurash bo‘yicha Milliy kengash yig‘ilishini o‘tkazadi. Shu muddat ichida u har bir tumanga “tashxis qo‘yadi”: nega “kasallangan”, nega “tuzalmayapti”, kim ularni qo‘llab-quvvatlayapti? Shularning barchasini aniqlab, korrupsiyaga botgan odamlarning ro‘yxatini tuzib chiqadi. Ularning masalasi esa keyin ko‘rib chiqiladi”, – dedi Prezident.
Avvalroq Shavkat Mirziyoyev bosh vazir va administratsiya rahbaridan ruxsat so‘ramay, majlis o‘tkazgan amaldor ishdan olinishini ta’kidlagani, Kogon shahrining 4 ta sektor rahbarini ishdan olgani hamda tuman sektor rahbarlari haftaning ikki kunini faqat yoshlar muammolarini hal etishga ajratishini ma’lum qilgani haqida xabar berilgandi.
Mavzuga doir:
- Shavkat Mirziyoyev O‘zbekistondagi 18-30 yoshlilar orasidagi rasmiy ishsizlar sonini ma’lum qildi
- “Ayrim amaldorlar aravani tortmayapti”. Shavkat Mirziyoyev yaqin kunlarda bir nafar hokim va vazir lavozimini tark etishini ma’lum qildi
- Shavkat Mirziyoyev: “Toshkent shahrida 77 mingta vakant ish o‘rinlari mavjud, shundan 45 mingtasiga oliy ma’lumot talab etilmaydi”
Izoh (0)