O‘zbekistonda transport vositalarini majburiy texnik ko‘rikdan o‘tkazish tartibi soddalashtiriladi. Bu haqda jamoatchilik muhokamasi uchun e’lon qilingan 2021-yil davlat dasturi loyihasida qayd etilgan.
Hujjatga ko‘ra, yangi avtomobilni texnik ko‘rikdan o‘tkazish talabi bekor qilinishi hamda transport vositasini texnik ko‘rikdan o‘tkazish eksterritoriallik prinsipi asosida, ya’ni “propiska”dan qat’i nazar, transport vositalarini davlat ro‘yxatidan o‘tkazish uchun murojaat qilish imkoniyati yo‘lga qo‘yilishi mumkin.
Shuningdek, transport vositasini texnik ko‘rikdan o‘tkazish muddatlari ham uzaytirilishi mumkin.
Avtomototransport vositalari va ular egalarining tarixini aks ettiruvchi elektron baza yaratiladi. Avtomobillarni boshqa shaxsga berish haqidagi shartnoma “yagona darcha” tamoyili asosida rasmiylashtirish imkoniyati berilishi mumkin.
Bundan tashqari, haydovchilik imtihonlarini videokuzatuv qurilmalari yordamida internet orqali kuzatish imkoni ham yaratilishi kutilmoqda.
Hujjat loyihasi muhokamasi 27-yanvargacha davom etadi.