Andijonda 800 o‘rinli aholini kasb-hunarga o‘qitish markazi foydalanishga topshirildi

Andijon shahrining Bog‘ishamol dahasida mehnat migrantlarini tayyorlaydigan markaz foydalanishga topshirildi, deya xabar berdi “Daryo” muxbiri Umidjon Mamarasulov.

Ma’lum bo‘lishicha, 800 o‘ringa mo‘ljallab barpo etilgan aholini kasb-hunarga o‘qitish markazi Prezidentning 2020-yil 11-avgustdagi “Kambag‘al va ishsiz fuqarolarni tadbirkorlikka jalb qilish, ularning mehnat faolligini oshirish va kasb-hunarga o‘qitishga qaratilgan hamda aholi bandligini ta’minlashga oid qo‘shimcha chora-tadbirlar to‘g‘risida”gi qarori ijrosini ta’minlash maqsadida Andijon ijtimoiy-iqtisodiyot va pedagogika kolleji negizida tashkil etilgan.

Markazning asosiy vazifasi ishsiz va xorijga chiqib mehnat qilish niyatida bo‘lgan fuqarolarni kasb-hunarga o‘qitish va qayta tayyorlashdan iborat. Shuningdek, markaz ishchilarning xorijdagi korxonalarga qonuniy ishga joylashishiga ko‘maklashadi va ularning xavfsizligini ta’minlashni ham o‘z zimmasiga oladi.

“O‘quvchilar ijtimoiy kelib chiqishi, qiziqishi va imkoniyatlaridan kelib chiqqan holda kasb-hunarga yo‘naltiriladi. Markazda tikuvchilik, mebel va yog‘ochga ishlov berish, avtomobillarga texnik xizmat ko‘rsatish, qurilish va pardozlash ishlari kabi 20 ga yaqin kasb-hunar hamda xorijiy tillar, shuningdek, boradigan davlatining qonunchiligi, migrantlar haq-huquqlari o‘rgatiladi. Bitiruvchilar diplomini olgach, mutaxassisligi bo‘yicha jahonning eng ilg‘or va yetakchi ishlab chiqarish korxonalari va xizmat ko‘rsatish tashkilotlarida faoliyatlarini davom ettirishlari mumkin”, — deydi viloyat hokimligi kotibiyat mudiri Elyorbek Xolmirzayev.

Qo‘shimcha qilinishicha, viloyat hokimligi tomonidan Rossiyaning Savdo-sanoat palatasi, Kasb-hunarga o‘qitishni rivojlantirish markazi hamda boshqa bir qator yirik va nufuzli ish beruvchilari bilan hamkorliklar o‘rnatilgan. Ayni paytda xorijiy ish beruvchilar tomonidan talab qilinayotgan 13 mingdan ziyod bo‘sh ish o‘rini to‘g‘risida ma’lumotlar shakllantirilgan.