O‘zbekiston Prezidenti Shavkat Mirziyoyev raisligida 26-noyabr kuni Qashqadaryo viloyatini ijtimoiy-iqtisodiy rivojlantirish va aholi hayotini yaxshilash masalalari bo‘yicha videoselektor yig‘ilishi o‘tkazildi.

Foto: Prezident matbuot xizmati

Prezidentning qayd etishicha, so‘nggi uch yarim yil ichida Qashqadaryoda biror sohada birorta vazir, birorta bosh vazir o‘rinbosari tizimli natija ko‘rsatmagan.

“Hamma tuman hokimlari, sektor rahbarlari bir xil ishlamayapti, ko‘pi ishlashni xohlamaydi. Mana shu savol bugun hammani qiynashi kerak. Qashqadaryoda, ming afsuski, natija mutlaqo yo‘q. Yo‘lda ham yo‘q, suvda ham yo‘q, yo‘lning sifati ham yo‘q. Ilm yo‘q qishloq xo‘jaligida, hosildorlik yo‘q, paxtaning navi yo‘q”, — dedi davlat rahbari.

Shavkat Mirziyoyevning so‘zlariga ko‘ra, Qashqadaryo misolida 2021-yilda yangi tizimga o‘tish kerak.

“Nima haqqi bor vazirning Toshkentda o‘tirishiga? Men har safar aytaman, vazir haftada ikki kun Toshkentda o‘tirishi mumkin. Qolgan vaqtda viloyatda bo‘lishi kerak, O‘zbekiston vaziri-ku u”, — deya ta’kidladi Prezident.

Qayd etilishicha, Qashqadaryo viloyati tumanlaridagi banklarga nisbatan aholining e’tirozlari juda ko‘p. Shu sababli davlat rahbari tuman banklari aholiga o‘z faoliyati bo‘yicha hisobot berishi zarurligini aytdi.

Shavkat Mirziyoyev bosh vazirga va vazirlarga Qashqadaryoda amalga oshirilayotgan ishlar yuzasidan har oyda hisobot qabul qilish va bu haqda davlat rahbariga ma’lumot berish yuzasidan topshiriq berdi. Prezidentning so‘zlariga ko‘ra, vazirning, hokim o‘rinbosarlarining qilgan ishiga qarab har chorakda kimni ishdan olish, kimni rag‘batlantirish haqida qaror qabul qilinadi.

“Har bir xonadonda 20 sotix yer bo‘la turib kambag‘al yashash dunyoda yo‘q. Juda katta imkoniyatlar mavjud. Qashqadaryodagi 3 million 300 mingdan ko‘p aholimiz davlat rahbarining xavotiri, davlat rahbarining ko‘magini sezishi kerak. Yo hozir, yo hech qachon. Xalq davlat borligiga ishonishi kerak”, — deya qo‘shimcha qildi davlat rahbari.