O‘zbekiston bosh vaziri o‘rinbosari, Respublika maxsus komissiyasi a’zosi Aziz Abduhakimov “O‘zbekiston 24” telekanali orqali 26-iyul kuni efirga uzatilgan intervyusida Ipak yo‘li xalqaro turizm universiteti magistranti vafot etganini ma’lum qildi.
Aziz Abduhakimov O‘zbekistonda amal qilayotgan karantin cheklovlarining 15-avgustga qadar uzaytirilishi sabablarini izohlar ekan, ushbu qaror aholiga qandaydir noqulayliklar keltirish maqsadida emas, balki hayotiy zarurat bo‘lgani uchun qabul qilinganini ta’kidlab o‘tdi.
Mavzuga doir: Bosh vazir o‘rinbosari Aziz Abduhakimov ota-onasi bir marta bozorga borib, koronavirus yuqtirib olganini ma’lum qildi
“Faqat karantingina kasallanish zanjirini uzishga imkon beradi. Busiz biz kasallik tarqalishining oldini ololmaymiz. Hatto yoshlar ham kasallikka chalinayotgani, oxir-oqibat ushbu holatlar fojiali yakun topayotganiga doir ko‘plab misollarni keltirishim mumkin.
Samarqanddagi Ipak yo‘li xalqaro turizm universitetining 33 yoshli magistranti ham, afsuski, ikki kun avval hayotdan ko‘z yumdi. Bunga shifokorlar o‘z vaqtida yordam ko‘rsata olmagani sabab bo‘ldi”, — dedi O‘zbekiston bosh vaziri o‘rinbosari Aziz Abduhakimov.
Foto: Facebook
Marhumning do‘sti bilan suhbatlashgan “Daryo” muxbirining xabar berishicha, 33 yoshli yigit, Ipak yo‘li turizm xalqaro universiteti magistranti O‘tkir Temirov 2020-yil 24-iyul kuni COVID-19’ virusidan vafot etgan.
Avvalroq ijtimoiy tarmoqlarda samarqandlik 33 yoshli erkak vafot etgani, marhum o‘limidan 10 kun oldin, 14-iyul kuni COVID-19’ virusini yuqtirib olgani, unda koronavirusning barcha belgilari bo‘lsa-da, test topshira olmagani, kasalxonaga ham yota olmagani haqida xabarlar tarqalgan, uning 20-iyul kuni tez yordam xizmati bilan telefon so‘zlashuvi audiosi e’lon qilingan edi.
“Bizlar kecha tez yordam chaqirgan edik. Kelib, hech narsa qilmasdan xuddi jo‘ramday suhbat qilib ketdi. ‘Bizlar hech qanday yordam berolmaymiz, poliklinikaga murojaat qilinglar, ertaga test oladi’, dedi. Test aniq bormi desam, ‘ha, bor, ular keladi’, deb aytdi”, — deydi suhbat jarayonida marhum O‘tkir Temirov.
Marhum O‘tkir Temirovning tez yordam navbatchisi bilan bo‘lgan muloqotidan u poliklinikaga telefon qilganini, ammo poliklinikada test yo‘qligini aytganini bilish mumkin. Bunga javoban tez yordam navbatchisi esa bemorlar viloyat Sanitariya va epidemiologiya osoyishtalik markazi yoki yashash manzilidagi poliklinikada test olishi lozimligi haqida ko‘rsatma beradi.
“Birinchi bo‘lib o‘zingizning poliklinikangizdan testdan o‘tishingiz kerak. Poliklinika bosh vrachiga murojaat etsangiz, balki o‘zi hal qilib berar. Bemor kontakda bo‘lgan bo‘lsa, to‘g‘ridan to‘g‘ri biznikilar (Tez yordam vakillari nazarda tutilmoqda. Tahririyat) borolmaydi. Test topshirmoqchi bo‘lsangiz, viloyat Sanitariya va epidimiologiya osoyishtalik markazi yoki poliklinika orqali hal bo‘ladi”, — degan tez yordam vakili.
Sakkiz kundan buyon isitmada bo‘lgan O‘tkir Temirov tez yordam vakili bilan suhbatda “Moviy tog‘lar yoki Tyan-Shan” nomli filmni esga olib, ularga filmdagidek bemorlarni sarson qilishayotganini, test topshirishning iloji bo‘lmayotganligini bildirgan.
“Yo‘q narsani qayerdan topshiradi? Osmondan test tushadigan kuni bo‘lsa ayting, qarab o‘tiraylik osmonga. Test deyapsizlar, kasallik alomatlari isbotlangan narsa. Nima kerak maynabozchilik qilib”, — degan O‘tkir Temirov.
Tez yordam navbatchisi esa bemorga agar poliklinika yordam qilolmayotgan bo‘lsa, viloyat Sanitariya- epidimiologiya osoyishtalik markaziga chiqishi mumkinligini aytgan. Va boshqa mutaxassisga go‘shakni bergan. U ham bemordan nima bezovta qilayotganini so‘ragan.
“Temperatura bezovta qilyapti, yo‘tal bezovta qilyapti. Holsizlik bezovta qilyapti. Test topshirmadik. So‘rab o‘tirmang. U yo‘q. Hozir isbotlab bo‘lindi. Alomatlar xuddi shu koronavirusning alomatlari. Test topshirish kerakmi?, — degan O‘tkir Temirov. — Menga bitta narsa kerak. Men uyda dadam bilan kasal bo‘lganman. Dadamga to‘rt kun bo‘ldi, menga sakkiz kun. Vrachlarning tavsiyasi bilan hamma muolajalarni oldim. Menga ‘foydasi yo‘q, hech qayerga murojaat qilib o‘tirma’, deb aytishdi. ‘Mana shu muolaja bilan davolanasan’ deyishdi. Hozirgi ahvolimga ko‘ra, menga ahvolni ko‘rib, qay darajada, nima kerakligi yoki kerak emasligini, olib ketish kerak yoki kerak emasligini aytib beradigan tomirida qoni bor odam kerak, tamom. Men bilan jo‘rachasiga suhbat qurib ketadigan emas”.
“Daryo” muxbiri bilan suhbatlashgan O‘tkir Temirovning do‘sti uning dafn marosimida qatnashganini, o‘sha kuni marhumning otasining ahvoli yaxshi ekanligini, biroq ayni kundagi vaziyatdan bexabarligini ma’lum qildi.
Sog‘liqni saqlash vazirligi Samarqand shahrida qayd etilgan, bosh vazir o‘rinbosari Aziz Abduhakimov tomonidan tilga olingan ushbu holat yuzasidan hozircha axborot bergani yo‘q. Vazirlik ma’lumotlariga ko‘ra, Samarqand viloyatida hozirgacha koronavirusga chalingan uch nafar bemor vafot etgan, viloyatdagi uchinchi o‘lim holati haqida SSV 7-iyul kuni xabar bergan.
Qayd etish joiz, Samarqand viloyati hokimi Erkin Turdimov hudud aholisiga 19-iyul kuni qilgan murojaatida shifokorlar “isitmasi ko‘tarilgan, koronavirus belgilari bo‘lgan bemorlarni ko‘rish uchun bormasligi”ni ta’kidlagan edi. Hokim buni “shifokorlarin asrash kerak”ligi bilan izohlagandi.
