Toshkent viloyati hokimi: Bir kunda tez yordamga bo‘lgan chaqiruvlarning 30 tasi isitma bilan bog‘liq, lekin 506 kishi kasalxonaga yotqizilgan. Bunday davolashning nima keragi bor?
Toshkent viloyati hokimligida 20-iyul kuni Sog‘liqni saqlash vaziri o‘rinbosari Ulug‘bek Sobirov ishtirokida videoselektor bo‘lib o‘tdi.
Toshkent viloyati hokimligi axborot xizmatidan “Daryo”ga ma’lum qilishlaricha, yig‘ilishda SSV mas’uli hududdagi 22 ta tuman shahar hokimlari va sektor rahbarlariga koronavirus infeksiyasiga qarshi kurash amaliyotiga qanday rahbarlik qilish, jarayonni nazoratda ushlash bo‘yicha mufassal tushuntirish bergan.
Bunda bemorlar va ularni davolashda ishtirok etayotganlar bilan muloqotda bo‘lish, ish olib borish metodikasini o‘zgartirish masalasi ham ko‘rib chiqilgan. Yig‘ilish davomida viloyat hokimi Rustam Xolmatov ayrim tuman hokimlarining sustkashligini qoraladi. Xususan, avval ajratilgan mobil rentgen qurilmalari hali ham Chirchiq shahriga, Parkent, Qibray, Oqqo‘rg‘on tumanlariga olib borib o‘rnatilmagani tanqid qilgan.
“Bu holat siyosatga xiyonat”, — deb alohida ta’kidlagan viloyat hokimi. Shuningdek, Rustam Xolmatov mobil guruhlar, call-markazlar va boshqa umumiy ishlarga tez yordam mashinalarini jalb etmaslik bo‘yicha hududlar rahbarlarini ogohlantirgan. Asosiy vazifasi aholiga tibbiy va psixologik maslahat berish bo‘lgan call-markazlarga asosan yoshlar jalb etilgani noto‘g‘ri ekanini ta’kidlagan.
“Call-markazdagi vakilimiz tuman rahbarlari ustidan jamoatchilik nazoratini o‘rnatishga salohiyati yetadigan, hududning obro‘li odamlaridan bo‘lishi kerak. Qayerda biror e’tiborsizlik bo‘lsa, hokimga, tibbiyot bo‘limiga ochiq gapira olishi kerak”, — deb ta’kidlagan viloyat rahbari.
Hokimning alohida ta’kidlashicha, vahima ostida tez yordamga murojaat qilganlarning barini kasalxonalarga joylashtirishdan mantiq yo‘q, aksincha, bu vahimaning yanada ortishiga sabab bo‘ladi. “Kecha tez yordamga 4290 ta chaqiruv bo‘lgan, shundan 30 tasi tana harorati ko‘tarilishi bilan bog‘liq, lekin 506 fuqaro kasalxonaga yotqizilgan. Bunday davolashning nima keragi bor? Oxir-oqibat bunday tartib kasallikni davolashga xizmat qilmaydi”, — degan u.
Yig‘ilishda viloyat sog‘liqni saqlash boshqarmasi boshlig‘i To‘raqul Arziqulov ushbu masala bo‘yicha fikr bildirib, ayrim tuman va shahar sog‘liqni saqlash bo‘limlari rahbarlari “vahima ostida, chuqur o‘rganmay, murojaat qilgan fuqarolarni kasalxonaga yotqizib qo‘ygani”ni ta’kidlagan va ulardan ortiq bunday qilmaslikni, tez yordamga murojaat qilgan bemorlarni mobil guruhlarning xulosasi bilan kasalxonaga yotqizish lozimligini qayd etib o‘tgan.
