O‘zbekistonda koronavirusga chalinganlar soni 17 000 nafardan oshdi

O‘zbekistonda 2020-yil 20-iyul soat 17:00 holatiga ko‘ra, koronavirus infeksiyasi qayd etilganlar soni 183 nafarga ko‘payib, ularning umumiy soni 17 149 nafarga yetdi. Bu haqda Sog‘liqni saqlash vazirligi xabar bermoqda.

Yangi kasallanganlarning

• 29 nafari karantin markazidagi (barchasi xorijdan kelgan) fuqarolar orasida;
• 154 nafari Toshkent shahrida tana harorati ko‘tarilganligi sababli profilaktika maqsadida hamda koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.

Eslatib o‘tamiz, 20-iyul soat 10:00 holatiga ko‘ra, 214 kishida koronavirus aniqlanib, infeksiya yuqtirganlar soni 16 966 nafarga yetgandi.

20-iyul kuni ayni paytga qadar Toshkent shahridagi tibbiyot muassasalarida 13 nafar, Samarqand viloyatida 46 nafar, Andijon viloyatida 26 nafar, Buxoro viloyatida 14 nafar hamda Jizzax viloyatida 9 nafar, jami 108 nafar bemor tuzaldi.

Shunday qilib, O‘zbekistonda 9387 nafar koronavirus infeksiyasiga chalingan fuqaro sog‘aygan.

“Hozirda mamlakatimizda 7672 nafar bemorga shifokorlarimiz tomonidan belgilangan standartlar bo‘yicha davo choralari ko‘rilmoqda”, — deyiladi SSV xabarida.

SSV ayni paytgacha koronavirusga chalingan 90 kishining vafot etgani haqida xabar berdi, “Daryo” hisob-kitobi bo‘yicha vafot etganlar soni 92 nafarni tashkil etadi.