Инвестициялар ва ташқи савдо вазирлиги «Тошкент шаҳрини комплекс ижтимоий-иқтисодий ривожлантириш ҳамда тадбиркорлик ва инновацион фаолиятни қўллаб-қувватлаш бўйича қўшимча чора-тадбирлар тўғрисида»ги Президент қарори лойиҳасини жамоатчилик муҳокамаси учун эълон қилди.
Ҳужжатга асосан, бир ой ичида 2020—2030 йилларда Тошкент шаҳрининг йўл-транспорт инфратузилмасини ривожлантириш концепцияси лойиҳасини ишлаб чиқиш ва Вазирлар Маҳкамасига киритиш режалаштирилмоқда.
Шунингдек, 2020—2030 йилларда Тошкент шаҳрининг йўл-транспорт инфратузилмаси объектларини қуриш ва реконструкция қилиш бўйича лойиҳаларни амалга ошириш учун 15 йиллик муддатга 200 миллион долларгача қийматда Ўзбекистон ҳукуматининг кафолати остида Франция тараққиёт агентлиги ва бошқа халқаро молиявий институтлар ва хорижий давлатларнинг молия ташкилотларининг қарз маблағларини жалб этиш кўзда тутилмоқда.
Бундан ташқари, Тошкент шаҳрининг Бектемир ва Сирғали туманлари ҳудудларидан оқиб ўтувчи Чирчиқ дарёси қирғоғининг 16 километрлик қисмини 65-80 метргача торайтириш ва торайтириш натижасида ҳосил бўлган бўш ер майдонларини электрон аукцион орқали сотиш ҳам режалаштирилган.
Қарор лойиҳасига кўра, 2020—2021 йилларда Тошкент шаҳрида умумий узунлиги 656 километр бўлган пиёдалар ва велосипедлар юриш йўлларини қуриш режалаштирилмоқда.
Молия вазирлиги Тошкент шаҳар ҳокимлигига мазкур лойиҳаларни амалга ошириш билан боғлиқ бўлган харажатлар учун 2023 йилгача муддатга 1 триллион сўм фоизсиз ссуда ажратиши назарда тутилган.
Изоҳ (0)