Navoiy viloyatida tanishidan 29 million 820 ming so‘m va 200 AQSh dollarini firibgarlik yo‘li bilan olib, pulni qaytarishga kelganda unga tuhmat qilgan ayol qo‘lga olindi. Bu haqda IIV huzuridagi Tergov departamenti xabar qilgan.

2020-yilning yanvar oyida 32 yoshli N.X. (ayol) Navoiy shahrida joylashgan kafelarning birida 40 yoshli X.I. bilan tanishib, unga Rossiyada vafot etgan akasining murdasini Navoiy viloyatiga olib kelib berishni va’da qiladi va 2020-yilning may oyigacha turli bahonalar bilan X.I. dan jami 29 million 820 ming so‘m va 200 AQSh dollari miqdoridagi pullarni firibgarlik yo‘li bilan qo‘lga kiritadi.

N.X. o‘zining jinoiy harakatlarini davom ettirib, 2020-yil 16-may kuni Navoiy shahar IIB boshlig‘i nomiga ariza bilan murojaat qiladi. Arizada tanishi X.I. uning uyiga kelib, unga yengil shikast yetkazib, umumiy bahosi 16 million 150 ming so‘mlik tilla taqinchoqlarini talonchilik yo‘li bilan qo‘lga kiritganligi haqida ma’lum qiladi. Ayol ayblovning sun’iy dalillarini vujudga keltirgan holda shaxsni og‘ir yoki o‘ta og‘ir jinoyat sodir etishda ayblab, o‘ziga o‘zi yengil tan jarohatlari yetkazadi.

Sudga oid ekspertiza xulosasiga ko‘ra, N.X.ning har ikkala qo‘l barmoqlaridan olingan tirnoq qirqmalarida o‘zining teri va qon dog‘lari mavjudligi aniqlangan.

Mazkur holat yuzasidan qo‘zg‘atilgan jinoyat ishi bo‘yicha dastlabki tergov harakatlari davomida Navoiy shahri bo‘yicha IIO FMB huzuridagi Tergov bo‘limi tomonidan fuqaro N.X. ga nisbatan O‘zbekiston Respublikasi Jinoyat kodeksining 168-moddasi 2-qismi “a” bandi (Firibgarlik), 237-moddasi, 2-qismi “a,b,g” bandlari (Yolg‘on ko‘rsatma berish), 238-moddasi 3-qismi “b” bandi (Yolg‘on guvohlik berish) va 139-moddasi 3-qismi “a,g” bandlari (Tuhmat) bilan ayblov e’lon qilingan.