“Diydor qiyomatga qoldi”. Hoshim Arslonovning do‘sti va shogirdlarining ushalmay qolgan armonlari haqida (video)

O‘zbekistonda xizmat ko‘rsatgan artist, dublyaj ustasi, taniqli aktyor Hoshim Arslonov 29-may kuni 64 yoshida olamdan o‘tdi.

Hoshim Arslonovning san’at olamidagi do‘stlari va shogirdlari “Daryo” muxbiri Feruz Muhammadga u bilan bog‘liq eng yaxshi xotiralari va armonlari haqida gapirib berishdi.

Kinolarda partnyor bo‘lib ishlash armoni...

Teatrda, sahnada Hoshim bilan juda ko‘p partnyor bo‘ldim. Mening bitta armonim qolib ketdi. U ham bo‘lsa, suratga olish maydonchalarida, kinolarda partnyor bo‘lib ishlash armoni. Biz bir-birimizni juda yaxshi tushunar edik. San’atga endi kirib kelayotgan yoshlarimiz Hoshim Arslonovdek insonlardan san’atga bo‘lgan fidoyilik, halollikni o‘rganishini xohlar edim.

Matyoqub Matchonov, O‘zbekistonda xizmat ko‘rsatgan artist

Hoshim aka o‘zlaridan tirik haykal yasab olmagan edi.

Juda kutilmagan narsa bo‘ldi. Messenjerda “Hoshim aka, nima gap? Ko‘rinmaysiz, sog‘-omonmisiz?” deganimda “Sal mazam yo‘q” deb yozgandilar. Oldinlari kulib turgan smayllar yuborardilar, o‘sha yozishganimda jo‘natmadilar. Shubhalanib “Umidvorman, jiddiy narsa yo‘qdir” deb yozsam, hech narsa yozmay, shunchaki “klass” jo‘natdilar. O‘shanda ko‘nglimga shubha tushgandi.

Bolalardan so‘raganimda qon bosimlari ko‘tarilgan bo‘lsa kerak, deyishdi. Ular haqida yomon xayollarni o‘zimdan haydardim, hammasi yaxshi bo‘lishiga ishonar edim. Yaqinda ular bilan bir serialga tushgan edik. O‘shanda ham ularni kutdik, ammo ularni kasalxonada deyishdi. Biz Hoshim akani sog‘-u salomat yonimizga kelishlarini, ishga chiqishlarini kutgandik. Ularning vafot etishlarini kutmagandik — hammamiz shokka tushib qoldik. Hoshim aka o‘zlaridan tirik haykal yasab olmagan, xokisor, oddiy, oliyjanob inson edi.

Mohira Nurmatova, aktrisa

Diydor qiyomatga qoldi…

Nima deyishga ham hayronman. Ularning yo‘qliklariga ishonging kelmaydi. Ularni qanday san’atkor ekanligini, san’atga qo‘shgan hissalarini barchamiz yaxshi bilamiz. Hoshim aka juda samimiy, yuzlaridan nur yog‘ilib turadigan, yaxshi inson edilar. Oxirgi marta 2007- yilda “Saodat” serialida birga ishladik. O‘shanda birga rol ijro etganimizda “qizim, bu joyida bunday ishlash kerak, bu xarakter bo‘yicha to‘g‘ri yo‘ldasan” deb maslahatlarini ayamagan edilar. Bilasizmi, ba’zida turmush tashvishlari, past-balandlari bilan ovora bo‘lib qolib, yaqinlarimizni, qadrdonlarimizni yo‘qlamay qolarkanmiz. Ulgura olmadim, diydor qiyomatga qoldi.

Nasiba Tursunova, aktrisa

Shu inson bilan juda ham rol o‘ynagim kelardi.

Har bir ko‘rishgan inson bilan alohida gaplashib, alohida salom-alik qilar edilar. Kichik rolimizni ham, ozgina muvaffaqiyatimizni ham e’tirof etardilar. Ustozlardan bunday gaplarni eshitish biz uchun baxt edi. Shu inson bilan juda ham rol o‘ynagim kelar edi, afsuski, ular bilan rol o‘ynash nasib etmadi. Oilalariga, muxlislari va shogirdlariga sabr-toqat tilayman.

Nargiza Abdullayeva, aktrisa