O‘zbekiston Prezidenti Shavkat Mirziyoyev 7-may kuni Xitoy Xalq Respublikasi raisi Si Szinpin bilan telefon orqali muloqot qildi. Bu haqda Prezident matbuot xizmati xabar berdi.
Qayd etilishicha, samimiy va do‘stona ruhda o‘tgan suhbatda O‘zbekiston va XXR yetakchilari ikki tomonlama hamkorlikka doir va xalqaro ahamiyatga molik dolzarb masalalarni ko‘rib chiqdi.
Davlat rahbarlari koronavirus infeksiyasiga qarshi davom etayotgan kurashning eng murakkab davrida ko‘rsatilgan o‘zaro ko‘mak va gumanitar yordamni katta mamnuniyat va minnatdorlik bilan qayd etdi.
“Aprel oyining ikkinchi yarmida ushbu xavfli virus bilan kasallanganlarni aniqlash, davolash va reabilitatsiya qilish sohasida Xitoyning ulkan amaliy tajribaga ega yetakchi shifokorlar guruhi mamlakatimizda bo‘ldi”, — deyiladi xabarda.
Shavkat Mirziyoyev xitoylik mutaxassislar yuksak professional mahorat namoyish etganligi, ularning mamlakat hududlaridagi mashaqqatli mehnati pandemiyaga qarshi kurashish choralarining samaradorligini oshirishga xizmat qilganini alohida ta’kidladi.
Davlat rahbarlari bularning barchasi O‘zbekiston va Xitoy o‘rtasidagi do‘stlik, o‘zaro hurmat va ishonchga asoslangan har tomonlama strategik sheriklik munosabatlari tobora mustahkamlanib borayotganidan dalolat berishini ta’kidladi.
Ikki mamlakatning sog‘liqni saqlash va sanitariya-epidemiologiya nazorati sohasidagi idoralari o‘rtasida faol almashinuvlarni davom ettirishga kelishib olindi.
Shuningdek, ko‘p qirrali, shu jumladan siyosiy-diplomatik, savdo-iqtisodiy, investitsiyaviy, moliya, energetika, qishloq xo‘jaligi, transport-kommunikatsiya, madaniy-gumanitar va boshqa muhim yo‘nalishlardagi hamkorlikning holati va uni kengaytirish istiqbollari batafsil muhokama qilindi.
XXRning ilg‘or tajribasini o‘rganish va joriy etish asosida kambag‘allikni qisqartirish masalalarida samarali muloqot boshlangani alohida ta’kidlandi.
Suhbat natijalariga ko‘ra ikki tomonlama oliy darajadagi tadbirlarga puxta tayyorgarlik ko‘rish ishlari davom ettiriladi.
Ikki mamlakat vazirlik va idoralari, hududlar ma’muriyatlari, bank-moliya institutlari va yetakchi kompaniyalari pandemiyaning salbiy oqibatlarini kamaytirish hamda o‘zaro manfaatli hamkorlik uchun yangi imkoniyatlarni izlash maqsadida hamkorlikdagi ishlarini faollashtiradi. Bular, avvalo, o‘zaro savdo hajmini oshirish va uning mutanosibligiga erishish, ishlab chiqarish kooperatsiyasini mustahkamlash va innovatsion loyihalarni amalga oshirish, yuk tashish hajmining o‘sishi uchun qulay sharoitlar yaratish, gumanitar dasturlarni ilgari surishdir.
Davlat rahbarlari mintaqaviy ahamiyatga molik qator dolzarb masalalar yuzasidan ham fikr almashdi. Birlashgan Millatlar Tashkiloti, Shanxay hamkorlik tashkiloti va boshqa nufuzli xalqaro tuzilmalar doirasida birgalikdagi sa’y-harakatlarni muvofiqlashtirib borishga qat’iy intilish tasdiqlandi.
Suhbat yakunida O‘zbekiston va Xitoy yetakchilari do‘stlik va har tomonlama strategik sheriklik ruhidagi keng ko‘lamli hamkorlikni bundan buyon ham kengaytirishga tayyor ekanligini yana bir bor ta’kidladi.
Eslatib o‘tamiz, Shavkat Mirziyoyev 7-may kuni Rossiya prezidenti Vladimir Putin bilan ham koronavirusga qarshi kurash masalasini muhokama qilgandi. 6-may kuni esa Shavkat Mirziyoyev va Eron prezidenti koronavirusning iqtisodiy oqibatlarini yumshatish masalalari yuzasidan fikr almashgandi.
Ma’lumot uchun, koronavirus pandemiyasi boshlanganidan buyon Shavkat Mirziyoyev koronavirusga qarshi kurash masalasida Qozog‘iston, Qirg‘iziston, Turkmaniston, Afg‘oniston, Tojikiston, Janubiy Koreya va Turkiya prezidentlari bilan telefon orqali muloqot qildi. Bundan tashqari, Shavkat Mirziyoyev Yevropa kengashi prezidenti Sharl Mishel bilan ham koronavirusga qarshi kurash masalasini muhokama qilgan edi.
O‘zbekiston Prezidenti 2-may kuni Qozog‘iston prezidenti Qosim-Jo‘mart To‘qayev bilan telefon orqali bo‘lib o‘tgan muloqotda Sardoba suv omborida yuz bergan holatni muhokama qilgandi. Shuningdek, Shavkat Mirziyoyev 4-may kuni Qirg‘iziston prezidenti So‘ronboy Jeenbekov, 5-may kuni Tojikiston prezidenti Emomali Rahmon va 6-may kuni Turkmaniston prezidenti Gurbanguli Berdimuhamedov bilan koronavirusga qarshi kurash masalasini hamda Sardobada yuz bergan falokatni telefon orqali muhokama qildi.