AQShda avtokinoteatrlar koronavirus sabab yana ommalashmoqda

20—22-mart kunlari AQShdagi deyarli barcha kinoteatlar koronavirus pandemiyasi sabab yopilgan edi. Umumiy kassa yig‘imlari shu qadar past bo‘lganidan studiyalar o‘z hisobotlarini e’lon qilmaslikka qaror qildi. Deadline ma’lumotlariga ko‘ra, Pixar’ning yangi loyihasi — “Olg‘a” multfilmi Amerikaning 135 kinoteatrida namoyish etilganiga qaramay, 71 ming dollargina to‘play olgan, deb xabar beradi “Kinopoisk”. Pixar multfilmlari tomosha qilingan 30 joyning 25 tasi — avtokinoteatrlar hisobiga to‘g‘ri kelmoqda.

Amerika ommaviy axborot vositalarining ta’kidlashicha, ushbu biznes to‘satdan yana jonlana boshlagan. Odatdagi kinozallardan farqli o‘laroq, avtokinoteatrlarda tomoshabinlar filmni ochiq osmon ostida — mashina salonidan tomosha qiladi. Bu kabi maydonchalar avtoturargoh zonasi va ulkan ekranga ega bo‘ladi.

AQShda ilk avtokinoteatrlar 1930-yillarda paydo bo‘lgan. Ushbu g‘oya Nyu-Jersi shtatidan bo‘lgan avtomobil sotuvchi Richard Xollingsxedga tegishli. Avvaliga u bu kabi tomoshalarni uyining orqasida namoyish etgan, 1933-yilga kelib, g‘oyani patentlagan. 1950-yillar oxiriga kelib esa avtokinoteatrlar mashhurlikka erishgan — o‘shanda AQShda 4063 ta shu turdagi joylar faoliyat ko‘rsatgan. 2019-yilning oktabri ma’lumotlariga ko‘ra, avtokinoteatrlar soni mamlakatda 305 tagacha tushib ketgan.

17-mart kuni Kaliforniyada joylashgan Paramount avtokinoteatriga odatdagidan ikki barobar ko‘proq tomoshabin tashrif buyurgan. Tomosha uchun 136 avtomobilga 360 ta chipta sotilgan. Shuningdek, Kanzas, Oklaxoma va Missurida ham avtokinoteatrlarga bo‘lgan qiziqish oshgani sezilgan.

Bunga pandemiya vaqtida avtokinoteatrlarning an’anaviy kinoteatrlardan biroz bo‘lsa-da xavfsizligi sabab qilib ko‘rsatilmoqda. COVID-19 koronavirusi tarqalganidan buyon AQShda 50 dan ortiq odamning bir joyda to‘planishi taqiqlangan.

Avtokinoteatrlarning multiplekslardan ajralib turuvchi jihati tashrif buyuruvchilar o‘rtasida aloqa bo‘lmaydi, chunki ularning har biri yopiq salonda o‘tiradi. Pandemiya kuchaygach, qo‘shimga choralar ham kiritilgan. Hozirda Paramount avtokinoteatrining kassiri tashrif buyuruvchilarga qo‘lqop taqib xizmat ko‘rsatmoqda, mashinalarning bir-biriga yaqin qo‘yilishi taqiqlangan. Ayrim joylarda esa chiplatalar telefon orqali skaner qilinmoqda.