O‘zbek shou-biznesi vakillari ijtimoiy tarmoqlardagi sahifalariga koronavirus haqidagi fikrlarini yozib qoldirib, odamlarni karantin qoidalariga rioya qilishga, vahima qilmaslikka va sabrli bo‘lishga chorlamoqda.
Foto: Instagram/@alimamadzhanov
Xususan, aktrisa Shahzoda Matchonova xorijdan qaytganidan so‘ng koronavirus aniqlangan o‘zbekistonliklarga nisbatan hurmatsizlik bilan munosabatda bo‘layotgan, ijtimoiy tarmoqlarda ular haqida xunuk gaplarni yozib qoldirganlarga murojaat qildi.
Aktyor Yigitali Mamajonov o‘z folloverlarini xotirjamlikni saqlab qolishga chaqirmoqda. “Agar peshonamizga shu kasallikka chalinib, vafot etish yozilgan bo‘lsa, demak bu taqdir, bu Allohning irodasi, muhimi xotirjamlikni saqlab qolaylik”, — deydi aktyor.
O‘zbekiston xalq artisti Yulduz Usmonova esa karantin davridan unumli foydalangan holda uydagi anchadan beri rejalashtirib qo‘yilgan ishlarni bitirib olayotganini aytdi. “Dunyo ishlaridan dam olaylik, dunyo ishlari bizdan dam olsin, balki Alloh ham shuni xohlagandir. 10-15 kun uyda o‘tirib tursak, hammasi o‘z izmiga tushadi”, — deydi xonanda.
Yulduz Usmonovaning fikrlarini yana bir xalq artisti Zulayho Boyxonova davom ettiradi. “Hech qanday vahimaga tushmanglar, mana yaqinda Navro‘z bayrami, televizorni qo‘yinglar, sizlar uchun yaxshi konsertlar tayyorlab qo‘ydik”, — deydi xonanda Instagram folloverlariga murojaatida.
Xonanda Abdurashid Yo‘ldoshev fuqarolarni karantin jarayoniga jiddiy munosabatda bo‘lishga chaqiradi. “Zarurat bo‘lmasa, odam gavjum joylarga bormang, bayramni ham imkon qadar uyda, oila davrasida o‘tkazishga harakat qiling”, — deydi u.
Mavluda Asalxo‘jayeva ham folloverlarini zarurat bo‘lmasa, ko‘chaga chiqmaslikka chaqirdi. Xonandaning aytishicha, o‘zi ham uyda o‘tiribdi, vaqtni unumli o‘tkazish uchun kitoblar o‘qiyapti. “Tohir Malikning ‘Odamiylik mulki’ kitobini o‘qidim”, — deydi u.
Xonanda Lola esa folloverlariga murojaat qilib, “Vahima qilib do‘konlardagi hamma makaronni sotib olish bizga emas, to‘g‘rimi, chunki biz kap-katta odamlarmiz, axir? Bu vaziyatda birdamlikda harakat qilib, muammoni bartaraf etishimiz mumkin”, — deydi.
Ma’lumot uchun, ayni paytda O‘zbekistonda koronavirus infeksiyasini yuqtirib olish bilan bog‘liq 23 ta holat aniqlangan.
