Toshkentdagi tashqi reklama obyektlari nima sababdan demontaj qilinayotganiga izoh berildi (video)
16-martdan boshlab Toshkent shahri ko‘chalaridagi qonun talabiga javob bermaydigan tashqi reklama obyektlariga qarshi qat’iy choralar ko‘rila boshlandi, deb xabar berdi poytaxt hokimligi axborot xizmati.
Qayd etilishicha, poytaxtda uch mingdan ortiq shunday obyektlar bor.
“Temir ustunga o‘rnatilgan va beton bilan qotirilgan metall konstruksiya bir necha yil davomida reklama beruvchilarga xizmat ko‘rsatgan. Uning egalari esa allaqachon daromad qilishga ham ulgurgan. Lekin qonunda belgilangan tartibda davlatga soliq to‘lamay kelgan. Shu sababli reklama obyekti shahar markazida turishga noloyiq deb topildi”, — deyiladi xabarda.
2020-yilning fevral oyida Vazirlar Mahkamasining “Tashqi reklama bozorini tartibga solish to‘g‘risida”gi qarori qabul qilindi.
Qaror bilan tashqi reklama obyektlarini qurish tartibi, qurish uchun beriladigan yer, bino va inshootlar ro‘yxatini shakllantirish, qurish huquqini elektron auksion orqali berish tartibi to‘g‘risidagi nizomlar tasdiqlandi. Ushbu qaror ijrosi yuzasidan ayni kunlarda ishchi guruh noqonuniy qurilmalarni aniqlashni boshladi.
“Bu tadbirdan maqsad shahar ko‘rkini buzib turgan, shuningdek hech qanday hujjatsiz o‘rnatilgan reklama obyektlarini demontaj qilib, shahar ko‘rkini saqlab qolish. Qonuniy, hujjat asosida ishlayotgan tadbirkorlar faoliyatiga to‘sqinlik qilinmaydi”, — deydi arxitektura rejalashtirish byurosi boshlig‘i o‘rinbosari Bahrom Rustamov.
Avvalroq, poytaxt reklamachilarning Prezident Shavkat Mirziyoyevning tadbirkorlarni qo‘llab-quvvatlash so‘zlari va tadbirkorlar faoliyatiga aralashmaslik haqida “O‘zavtoyo‘l” davlat qo‘mitasiga qaratilgan chorlov aks etgan reklama bannerlari paydo bo‘lgani haqida xabar berilgan edi.
Qayd etilishicha, Toshkent shahrida bugungi kunda 10 mingdan ortiq tashqi reklama obyektlari bor, ulardan 7 mingdan sal koprog‘ida obyekt pasporti mavjud, qolganlari esa noqonuniy o‘rnatilgan.
