Koronavirus O‘zbekistonga kirib kelsa, uning oldini olish uchun tegishli shifoxonalarda o‘rinlar, dori vositalari va tibbiy buyumlar zaxirasi ajratilgan. Bu haqda O‘zbekiston sog‘liqni saqlash vazirining birinchi o‘rinbosari Bahodir Yusupaliyev “Daryo” muxbiri Musulmonbek Ibrohimovga bergan intervyusida aytib o‘tdi.

Bahodir Yusupaliyev
Foto: Xalqaro press klub

Sog‘liqni saqlash vakilining ta’kidlashicha, vaziyatni inobatga olib Prezident Shavkat Mirziyoyev tomonidan tegishli farmoyish qabul qilingan.

Farmoyishda asosan koronavirus kasalligi O‘zbekistonga kirib kelishining oldini olishga qaratilgan barcha choralarni ko‘rishimiz belgilangan. Bu borada bugungi kunda O‘zbekistondagi sanitariya-karantin punktlarida barcha sharoitlar yaratilgan. Teplovizorlar qo‘yilgan, bundan tashqari shifokorlar — infeksionist, epidemiologlar navbatchiligi tashkil etilgan. Ayniqsa, Xitoy Xalq Respublikasidan kelayotgan yurtdoshlarimiz karantin-sanitariya punktlaridan o‘tadi va nazoratdan o‘tkaziladi.

Mabodo ushbu kasallik respublikamizga kirib kelsa, bu bo‘yicha ham tayyorgarligimiz bor. Tegishli shifoxonalarimizda o‘rinlar, dori vositalari va tibbiy buyumlar zaxirasi ajratilgan. Kerakli miqdorda tibbiy yordam tashkil etiladi.

Mamlakatmizga Uxan va Pekin shahridan 584 nafar fuqaro olib kelingan. Ular bugungi kunda alohida ajratilgan sanatoriy va tibbiyot muassasalariga joylashtirilgan. Bu muassasalarimizda barcha sharoitlar yaratilgan, kamchiliklarimiz yo‘q. Dori-darmon zaxirasi va shifokorlar nazorati o‘rnatilgan.

Bahodir Yusupaliyev, sog‘liqni saqlash vazirining birinchi o‘rinbosari 

AQSh davlat kotibi Maykl Pompeo koronavirusdan himoyalanish uchun kerakli infratuzilmaga ega bo‘lmagan hududlardan biri sifatida O‘zbekistonni ham qayt etdi. Uning fikricha, O‘zbekiston koronavirus kabi keng ko‘lamli xavfga qarshi tura olish imkoniyatiga ega emas.

13-fevral holatiga ko‘ra, yangi turdagi koronavirus o‘chog‘i hisoblangan Xitoyning Xubey provinsiyasida so‘nggi bir sutka davomida COVID-19 infeksiyasi asoratlaridan 242 kishi vafot etdi, deb xabar berdi Xitoy hududiy gigiyena va sog‘liqni saqlash qo‘mitasi. Umumiy hisobda provinsiyada 1310 ta o‘lim holati qayd etilgan. Koronavirus infeksiyasi bilan bir sutka ichida Xubeyda 14 840 ta yangi kasallanish holati qayd etilgan. 13-fevral tongi holatiga ko‘ra, COVID-19 infeksiyasi bilan kasallangan jami 48 206 kishi ro‘yxatga olingan. Epidemiya boshlanganidan beri 3 441 nafar bemor davolanib, uyiga javob berilgan — so‘nggi bir sutka davomida davolanib bo‘lganlar soni 802 kishiga ko‘paygan. Hozirda 33 693 kishi hali ham davolanishda qolmoqda, ulardan 5 647 nafarining ahvoli juda og‘ir.