Hindistonning Dehli shahriga amaliy tashrif bilan kelgan O‘zbekiston tashqi ishlar vaziri Abdulaziz Komilov 14-yanvar, seshanba kuni Hindiston tashqi ishlar vaziri Subrahmanyam Jaishankar bilan uchrashdi. Bu haqda O‘zbekiston Tashqi ishlar vazirligi xabar berdi.

Foto: O‘zbekiston Tashqi ishlar vazirligi

Suhbat boshida O‘zbekiston TIV rahbari Hindiston Tashqi ishlar vazirligi shafeligida o‘tkazilayotgan “Raisina Dialogue” beshinchi xalqaro konferensiyasiga taklif uchun minnatdorlik bildirdi.

Uchrashuvda Prezident Shavkat Mirziyoyev va bosh vazir Narendra Modi o‘rtasidagi muhim kelishuvlarga asoslangan O‘zbekiston—Hindiston hamkorligining holati va istiqbollari muhokama qilindi.

Vazirlar 2020-yilda bo‘lib o‘tadigan oliy va boshqa darajalardagi uchrashuvlar jadvali, qo‘shma tadbirlar o‘tkazish muddatlari bo‘yicha takliflarni ko‘rib chiqdi.

O‘zbekiston va Hindiston iqtisodiy sohadagi hamkorlikni kengaytirishga ustuvor ahamiyat berishi ta’kidlandi.

Uchrashuvda Afg‘oniston masalasiga alohida e’tibor qaratildi. O‘zbekiston va Hindistonning Afg‘onistondagi vaziyatni tezroq barqarorlashtirishdan manfaatdorligi tasdiqlandi, bu esa mintaqadagi hamkorlikni faollashtirish va kengaytirish uchun keng imkoniyatlarni ochib berishi qayd etildi. Ushbu maqsadlarga erishishga 2019-yil yanvar oyida Samarqand shahrida ilk bor o‘tkazilgan tashqi ishlar vazirlari darajasida Afg‘oniston ishtirokidagi “Hindiston—Markaziy Osiyo” muloqoti majlislarining muntazam o‘tkazilishi ham ko‘maklashadi.

Uchrashuvda madaniy-gumanitar, ayniqsa, ta’lim va fan sohalaridagi aloqalarni mustahkamlash istiqbollari muhokama qilindi.