O‘zbekiston innovatsion rivojlanish vaziri Ibrohim Abdurahmonov boshchiligidagi delegatsiya 29-noyabr, juma kuni Hindistonning Gujarat shtatidagi iCreate (International centre for entrepreneurship and technology) markazi hamda startaplarni rivojlantirish bilan shug‘ullanuvchi DevX kompaniyalariga tashrif buyurdi. Bu haqda vazirlik tomonidan “Daryo”ga ma’lum qilindi.

Foto: O‘zbekiston Innovatsion rivojlanish vazirligi

Innovatsiyalar bo‘yicha Hindistonning eng yetakchi hududi bo‘lgan Gujarat shtatining eng yirik shahri Ahmadobod atrofida qad rostlagan iCreate tadbirkorlik va texnologiyalar xalqaro markazida tadbirkorlik, tadqiqotchilik, innovatsiyalar, axborot texnologiyalari, muhandislik va boshqa sohalarning yetakchi mutaxassislari faoliyat yuritadi. DevX kompaniyasi esa texnik ekspertiza va korporativ aloqalarni o‘rnatishda 20 yillik tajribaga ega bo‘lgan yirik innovatsion tuzilma bo‘lib, korporatsiyalarga turli murakkablikdagi biznes masalalarni hal etishda ko‘mak beradi.

Tashrif doirasida O‘zbekiston Innovatsion rivojlanish vazirligi huzuridagi Ilg‘or texnologiyalar markazi hamda Hindistonning iCreate markazi, shuningdek, DevX kompaniyasi o‘zaro Anglashuv memorandumlarini imzoladi. Memorandumni imzolash marosimida O‘zbekiston innovatsion rivojlanish vaziri Ibrohim Abdurahmonov hamda Hindistonning Gujarat shtati ta’lim vaziri Shri Bupendrasinx Chudasama ishtirok etdi.

Foto: O‘zbekiston Innovatsion rivojlanish vazirligi

Kelishuvlarga ko‘ra, tomonlar tadqiqotlar va innovatsiyalar sohasida ikki mamlakat startaplari o‘rtasidagi ikki taraflama hamkorlikni mustahkamlash bo‘yicha qator ishlarni amalga oshiradi. Hamkorlik doirasida O‘zbekistonda tashkil etilgan startap kompaniyalari Hindistonga o‘z texnologiyalarini transfer qilish imkoniyatiga ega bo‘ladi. Shuningdek, hind texnologik startaplari, kichik va o‘rta biznes vakillari O‘zbekistonga tashrif buyurib, innovatsiyalar rivoji uchun O‘zbekistondagi mavjud sharoitlar bilan tanishadi.

Foto: O‘zbekiston Innovatsion rivojlanish vazirligi

Innovatsiyalar va startap ekotizimini rivojlantirish sohasidagi ilg‘or tajribalar bilan almashish, inson kapitalini takomillashtirish hamkorlikning bosh maqsadi hisoblanadi. Shuningdek, Hindiston va O‘zbekiston ilmiy jamoatchiligi o‘rtasida muloqotni kengaytirish, turli sohalarda qo‘shma tadqiqotlar olib borilishiga qaratilgan loyihalar ham amalga oshirilishi ko‘zda tutilgan.

Foto: O‘zbekiston Innovatsion rivojlanish vazirligi

Foto: O‘zbekiston Innovatsion rivojlanish vazirligi

Ilg‘or texnologiyalar markazida hindistonlik hamkorlar bilan birgalikda bir qator qo‘shma startap loyihalarini o‘zida birlashtiruvchi texnologik xabni tashkil etishga kelishildi. Texnologik xab startap loyihalari mualliflari va ijrochilarini, mazkur startap loyihalarning sohalari bo‘yicha mutaxassislarni jamlashga qaratilgan bo‘lib, unda mavzular bo‘yicha ommaviy tadbirlar, ma’ruzalar, seminarlar, konferensiyalar, shuningdek, ilm-fan va innovatsiyalarni targ‘ib qiluvchi tadbirlar o‘tkaziladi.