Ijtimoiy tarmoqlarda 2017-yili ta’mirlash ishlari uchun yopilgan O‘zbekiston Milliy bog‘idagi Alisher Navoiy haykali o‘rnida ekskavator turgani aks etgan suratlar tarqaldi.

Foto: Telegram

Toshkent shahar hokimligidan “Daryo”ga ma’lum qilishlaricha, Alisher Navoiy haykali atrofida qurilish va rekonstruksiya ishlarini olib borish jarayonida haykal vaqtincha bog‘ning o‘zida boshqa joyga ko‘chirilgan. Hokimlik avvalroq haykal atrofidagi daraxtlar kesilmasdan, boshqa joyga ko‘chirilayotgani haqida xabar bergan edi.

Reja bo‘yicha, haykal 2020-yil yanvar oyida, restavratsiya ishlari yakuniga yetganidan so‘ng, Adiblar xiyoboniga qaratilgan holda o‘z joyiga qayta o‘rnatiladi (bungacha haykal boshqa tomonga qarab turgan). Yangilangan haykalning ochilishi 2020-yil fevralida, Alisher Navoiy tavallud kuni arafasida bo‘lib o‘tishi kutilmoqda.

Eslatib o‘tamiz, Alisher Navoiy nomidagi O‘zbekiston Milliy bog‘i uning bazasida “zamonaviy va yuqori texnologiyali” madaniyat va istirohat bog‘i barpo etish maqsadida 2017-yil sentabrida yopilgan edi. Park, Vazirlar Mahkamasi qaroriga muvofiq, Stargate Systems kompaniyasiga ijaraga berilgan — ijara muddati loyiha ishlari yakunlanadigan 2021-yil 1-yanvardan boshlab 49 yilni tashkil etadi.

O‘zbekiston Milliy bog‘idagi Alisher Navoiy haykali 1991-yilda, shoirning 550-yilligi munosabati bilan ochilgan. Toshkent ramzlaridan biri bo‘lgan mazkur haykalning surati, jumladan, O‘zbekistonning 1994-yilda muomalaga chiqarilgan 5 so‘mlik valyutasiga tushirilgan edi.

5 so‘mlik