“Inter” o‘z maydonida g‘alaba qozonib, A Seriyada peshqadamga aylandi

Futbol bo‘yicha Italiya A Seriyasining 14-turi doirasida 1-dekabr, yakshanba kuni navbatdagi 3 ta bellashuv bo‘lib o‘tdi.

Antonio Konte boshqaruvidagi Milanning “Inter” jamoasi “Juzeppe Meatssa” stadionida SPALni sinovdan o‘tkazdi.

Uchrashuvning 16 hamda 41-daqiqalarida neradzurrilar hujumchisi Lautaro Martines ikki bor raqib darvozasiga gol urgan bo‘lsa, 50-daqiqaga kelib mehmon jamoa yarim himoyachisi Mattia Valoti o‘z hisobiga bitta gol yozdirib qo‘ydi.

Shu tariqa milanliklar o‘z maydonida kechgan bahsda SPALni 2:1 hisobida mag‘lub etdi va muhim 3 ochkoga ega bo‘ldi.

Mazkur g‘alabadan so‘ng “Inter” ochkolari sonini 37 taga yetkazib oldi va musobaqa jadvalida yetakchilikni o‘z qo‘liga oldi. SPAL esa 9 ochko bilan 19-o‘rinda bormoqda.

Shu kuni Stefano Pioli qo‘l ostidagi “Milan” mehmonda “Parma” bilan bahsga kirishdi.

Bellashuvdagi yagona gol 88-daqiqa urildi. Unga Milan klubi himoyachisi Teo Ernandes mualliflik qildi.

Natijada “Milan” yagona gol evaziga g‘alaba qozondi va 3 ochkoni qo‘lga kiritdi (1:0).

Qayd etish joiz, “Milan” 17 ochko to‘plab, musobaqa jadvalida 11-pog‘onani band qilib turibdi. “Parma” esa 18 ochko yig‘ib 9-o‘rinda bormoqda.