Toshkent shahrida “Ostona” xalqaro moliya markazidek moliyaviy markaz ish boshlaydi. Bu haqda “Ostona” xalqaro moliya markazi huquq akademiyasi akademik kengashi a’zosi Igor Rogov Olmaota shahrida o‘tkazilayotgan yuristlar forumida ma’lum qildi, deb yozadi Spot.
Foto: Go‘zal Jalilova
“O‘zbekistonlik hamkasblarimiz bilan kelishuv mavjud bo‘lib, ular Toshkentda bunday markaz va Navoiy erkin iqtisodiy zonasini ochmoqda. Ular “Ostona” xalqaro moliya markazi bilan hamkorlik qiladi. Hamkorlik doirasida o‘zbekistonlik advokatlarni ham o‘qitamiz”, — degan Igor Rogov.
“Ostona” xalqaro moliya markazini “mamlakat ichidagi mamlakat” deb ham atashadi. U 2018-yilning yozida ish boshlagan.
Qozog‘iston jahon kapital bozorining yetakchi ishtirokchilarini (Xitoy davlat fondlaridan tortib, Shveysariya xususiy banklarigacha) soliq imtiyozlari hamda qator afzalliklar taqdim etgan holda jalb etishga umid qilmoqda.
Avgust oyida o‘zbekistonlik bir guruh jurnalistlar uchun “Ostona” xalqaro moliya markaziga press-tur uyushtirilgan edi.
