Mustaqillik bayrami arafasida bir guruh o‘zbekistonlik jurnalistlar uchun Ostona xalqaro moliya birjasi tomonidan Nur-Sulton shahriga media-tur uyushtirildi.

Foto: Go‘zal Jalilova

O‘zbekistonning yetakchi internet-nashrlari jurnalistlari Ostona xalqaro moliya markazi, xususan uning qoshida tashkil etilgan xorijliklarga xizmat ko‘rsatish markazi faoliyati bilan tanishdi.

Xorijliklarga xizmat ko‘rsatish markazining asosiy vazifasi xorijiy fuqarolar va tadbirkorlarga yordam berish hisoblanadi.

Bu yerda xorijiy davlatdan biznes qilish uchun Qozog‘istonga kelgan tadbirkorga kelishidan tortib, o‘z faoliyatini yo‘lga qo‘yish jarayonining turli bosqichlarida ko‘mak beriladi.

Biz ularning shaharga, biznes muhitiga moslashishi uchun ko‘mak beramiz. Qozog‘istonga kelgan tadbirkor qanday muammolarga to‘qnash keladi, masalan viza, migratsiya, elektron kalit ochish, soliq to‘lovchi sifatida ro‘yxatdan o‘tish bilan bog‘liq muammolar. Biz ushbu muammolarning barchasini mana shu markazda hal qilamiz, — deydi Ostona xalqaro moliya markazi qoshidagi xorijliklarga xizmat ko‘rsatish markazi rahbari O‘ljas Bukenov.

Foto: Go‘zal Jalilova

Qayd etilishicha, ushbu markaz dastavval Ostona xalqaro moliya markazi ishtirokchisi bo‘lgan kompaniyalar xodimlariga xizmat ko‘rsatish uchun tashkil qilingan. Mamlakat rahbariyati tomonidan joriy yilning boshida markaz Qozog‘istonga tashrif buyurgan barcha xorijiy mamlakatlar fuqarolari uchun xizmat ko‘rsatishi belgilandi.

“Ya’ni biz Nur-Sultonda ishlash uchun kelayotgan barcha investorlar, xorijiy ekspertlar uchun ochiqmiz”, — deydi O‘ljas Bukenov.

Foto: Go‘zal Jalilova

Qozog‘istonda yagona darcha markazi tizimi mavjud bo‘lib, mamlakat fuqarolari uchun yashash joyidan ma’lumotnoma, tug‘ilgan, nikoh tuzilganligi yoki nikoh bekor qilingani haqidagi guvohnoma taqdim etish, pasport xizmatlari aynan ushbu markazlarda ko‘rsatiladi. Ammo bu tizim faqat Qozog‘iston fuqarolari uchun ishlaydi. Ostona xalqaro moliya markazi qoshidagi xorijliklarga xizmat ko‘rsatish markazi ham aynan yagona darcha markazining xorij fuqarolari uchun muqobili hisoblanadi. Ya’ni xorijiy fuqarolar bu yerda yuqorida sanab o‘tilgan barcha xizmatlardan foydalanishi mumkin.

“Yagona darcha markazlarida uzundan uzoq navbatlar kuzatiladi, bizning markazda esa navbatlar deyarli bo‘lmaydi. Ayrim investorlarda til bilan bog‘liq muammolar bo‘ladi. Bizning markazimizdagi barcha xodimlar ingliz tilida erkin so‘zlashadi. Xodimlarimiz xorijiy fuqarolarga barcha jarayonlarda tushuntirish beradi, ularga yo‘l-yo‘riq ko‘rsatadi”, — deydi O‘ljas Bukenov.

Foto: Asqar Yakubov

Xorijliklarga xizmat ko‘rsatish markazida Wi-Fi hamda zamonaviy kompyuter bilan jihozlangan maxsus xona mavjud bo‘lib, investor bu yerda pochtasini tekshirishi, qandaydir hujjatni nashr qilishi mumkin.

Markazda maxsus investorlarga xizmat ko‘rsatish bo‘limi ham ishlaydi. Investitsiyalar yuzasidan tadbirkorda qandaydir savollar tug‘ilsa, ushbu bo‘limda ishlovchi xodimlar investorga yordam ko‘rsatadi.

Foto: Go‘zal Jalilova

“Masalan, investor Nur-Sultonga kelib, zavod sotib olmoqchi. U oldi-sotdi jarayoni uchun qanday hujjatlar talab qilinishi, ishni nimadan boshlashi, qayerga murojaat qilishi haqidagi savollariga shu yerdan javob topadi.

Bundan tashqari biz investorga biznesi uchun ijaraga ofis yoki yashash uchun uy  topishga ham yordam beramiz.

Biz hamkorlik doirasi deb nomlaydigan xizmat turimiz bor. Investorga markazimiz bilan hamkorlik qiluvchi, ko‘chmas mulk agentliklari ro‘yxatini beramiz. Investor ulardan o‘ziga ma’qul kelganini tanlab oladi”, — deydi O‘ljas Bukenov.

Foto: Go‘zal Jalilova

E’tiborlisi, markazda xizmatlar mutlaqo bepul ko‘rsatiladi. Investorlar mamlakat qonunchiligida davlat boji to‘lanishi talab etiladigan xizmat turidan foydalansa, ushbu xizmat uchun davlat boji to‘laydi.

“Xorijiy fuqarolarning farzandlarini maktabga joylashtirish, tibbiy xizmat, avtomobillarni rasmiylashtirish, ularga texnik xizmatlar, hatto uy hayvonlariga veterinar xizmatlargacha tavsiyalar beramiz. Shu bilan birga, biz tavsiya qilgan hamkorlar mehmonlarga qanday xizmat ko‘rsatgani, ularning qoniqishi qay darajadaligini ham kuzatib boramiz. Agar sifatsiz xizmat ko‘rsatilsa, asossiz baland narxlar taklif qilinsa, ular hamkorlarimiz safidan o‘chiriladi.

Hozir yangi loyiha ustida ishlayapmiz. Diplomatlar yoki investorlarning ayollari (yoki erlari) mahalliy sharoitga moslashuvi uchun ularga mos ish qidirish, bandligini ta’minlash rejamizda bor”, — deydi O‘ljas Bukenov.

Sevara Nishonova

Toshkent—Nur-Sulton—Toshkent