Zargar Ahmed Aliyev: “MXX raisi birinchi o‘rinbosari Shuhrat G‘ulomov Shavkat Mirziyoyevni jismonan yo‘q qilmoqchi bo‘lgan”

Jasliq qamoqxonasida o‘tirib chiqqan “Aliyev zargari” (Gold Center) zargarlik kompaniyasi rahbari Ahmed Aliyev O‘zbekistonda 2011—2012-yillarda mamlakatning o‘sha vaqtdagi prezidenti Islom Karimovni hokimiyatdan chetlatish va o‘sha vaqtda bosh vazir lavozimida faoliyat olib borgan Shavkat Mirziyoyevni o‘ldirishni maqsad qilgan to‘ntarish rejalashtirilganini ma’lum qildi. U bu haqda 21-oktabr kuni Toshkentda o‘tkazilgan matbuot anjumanida ma’lum qildi.

Ahmed Aliyev 2012-yili hibsga olingan, unga nisbatan Jinoyat kodeksining 23 ta moddasi bo‘yicha ayblov e’lon qilingan. 2013-yili esa u uyushgan jinoiy guruh tuzishda aybdor deb topilib, 20 yilga ozodlikdan mahrum etilgan edi. 2019-yil sentabrida esa jinoyat ishlari bo‘yicha Toshkent viloyati sudi “Aliyev ishi”ni qayta ko‘rib chiqib, uni sud zalidan ozod qilgan edi.

Aliyevning so‘zlariga ko‘ra, uning qamalishiga bir tomondan iqtisodiy, boshqa tomondan esa siyosiy sabablar bo‘lgan. Uning o‘zi qamalishida siyosiy sabablarni asosiy rol o‘ynagan deb hisoblaydi.

“2011—2012-yillarda O‘zbekistonda davlat to‘ntarishi tayyorlangan. Agar o‘sha to‘ntarish amalga oshsa, o‘sha vaqtdagi prezident Islom Karimov lavozimidan chetlatilardi. O‘sha davlat to‘ntarishi doirasida o‘sha vaqtda bosh vazir lavozimida bo‘lgan Shavkat Mirziyoyev jismonan yo‘q qilingan bo‘lardi. Takrorlayman, uni jismonan yo‘q qilishmoqchi edi. Meni shu to‘ntarish haqida bilib qolganim uchun qamashgan”, — deydi Ahmed Aliyev.

Ma’lumot uchun, MXX (hozirgi DXX)ning sobiq birinchi o‘rinbosari Shuhrat G‘ulomov 2017-yili O‘zbekiston Harbiy sudi tomonidan konstitutsiyaviy tuzumga tajovuz qilish va giyohvand moddalar kontrabandasini tashkil etishda aybdor deb topilib, umrbod ozodlikdan mahrum etilgan edi. Shavkat Mirziyoyev uni “sotqin” deb atagan edi.