O‘zbekiston fevralda yevrobondlar chiqarishni muvaffaqiyatli boshlaganidan so‘ng bu yil yana bir marta dollarda yevroobligatsiyalar chiqargan holda jahon bozoriga yo‘l ochishi mumkin. Bu haqda O‘zbekiston Markaziy banki rahbari Mamarizo Nurmuratov 3−5-iyul kunlari Sankt-Peterburgda bo‘lib o‘tgan Xalqaro moliya kongressi maydonlarida ma’lum qildi, deb xabar beradi “Gazeta.uz”.

Foto: “Gazeta.ru”

“Xalqaro sarmoyadorlar mamlakat kredit tarixini ko‘rish imkoniyatiga ega bo‘lishlari lozim. Bizning birinchi chiqarishimiz hali bizga tarix yaratmaydi, u shunchaki benchmark yaratdi”, — dedi Markaziy bank rahbari.

Mamarizo Nurmuratov so‘zlariga ko‘ra, yangi obligatsiyalar 1 milliard dollarlik qiymatda chiqariladi. O‘zbekiston tijorat banklari ham joriy yildan dollardagi obligatsiyalarini sotishni boshlashlari mumkin, deya qayd etdi Markaziy bank rahbari.

“Bizga davlat xarajatlari uchun pul kerak emas, biroq biz xalqaro bozorda mavjud bo‘lib turishimiz lozim”, — deb hisoblaydi Mamarizo Nurmuratov. U ayni vaqtda obligatsiyalarning dollarda chiqarilayotgani mantiqli ekanini qo‘shimcha qildi, chunki mamlakat tashqi savdosi, asosan, ushbu valyutada amalga oshiriladi.

Investorlar O‘zbekistonga yevrobondlarning birinchi savdosi uchun 5,5 milliard dollardan ziyod mablag‘ taklif etgan edi. Bloomberg Barclay indeksiga ko‘ra, obligatsiyalar 14-fevralda savdoga chiqarilgan vaqtdan 8,4 foizga ko‘tarilgan. Rivojlangan bozorlarda bu ko‘rsatkich 6,2 foizni tashkil etadi.

“Biz chet ellik sarmoyadorlarga to‘g‘ridan to‘g‘ri investitsiyalar uchun signal beramiz va qarz majburiyatlari bozoriga chiqamiz”, — dedi Mamarizo Nurmuratov.

Birinchi sotuvdan tushgan mablag‘lar quyidagi shaklda taqsimlandi: 889,2 million dollar auksion orqali tijorat banklari depozit hisob raqamlariga joylashtirildi, 20 million dollar “Agrobank”ka qarz sifatida berildi, 89,9 million dollar esa Navoiy kon-metallurgiya kombinatiga ssuda sifatida ajratildi.