Zelenskiy Ukraina konstitutsiyasining komiksini taqdim etdi

Ukraina prezidenti Vladimir Zelenskiy o‘zining Facebook’dagi sahifasiga Ukraina konstitutsiyasining komiksini joylashtirdi.

Zelenskiyning yozishicha, mazkur tashabbus “Osnovi” nashridan chiqqan. Konstitutsiyaning komikslarda ifodalanishi 4 yoshdan 8 yoshgacha bo‘lgan bolalar uchun mo‘ljallangan. Illyustratsiyalar yordamida bolalarga Ukraina fuqarolarining huquq va majburiyatlari tushuntirib beriladi.

Avvalroq, Zelenskiy mamlakat aholisini Konstitutsiya kuni bilan tabriklab, barchani fleshmobda ishtirok etishga chorlagan edi. Unga ko‘ra har bir fuqaro Ukraina qomusidagi o‘ziga yoqqan moddani videorolik sifatida yozib olib, tarqatishi kerak. Zelenskiyning o‘zi 3-moddani tanlagan. Unda “Inson hayoti va sog‘lig‘i, sharaf va qadr-qimmati, daxlsizligi hamda xavfsizligi Ukarinada eng oliy ijtimoiy qadriyat sifatida qaraladi”, deyilgan.

Prezident mazkur fleshmobda Ukraina deputatlaridan ishtirok etmaslikni so‘ragan. “Ularning eng yaxshi ko‘rgan moddasi bu — 80. Daxlsizlik haqidagi”, — deya oydinlik kiritadi Zelenskiy.