“O‘zbekistonni rivojlantirish banki” tashkil etiladi. Bankka Prezident tomonidan 500 mln dollar ajratiladi
O‘zbekiston Prezidenti Shavkat Mirziyoyev tomonidan Markaziy bankka “O‘zbekistonni rivojlantirish banki”ni tashkil etishi topshirig‘i berildi. Bu haqda Markaziy Bank boshqaruv raisi Mamarizo Nurmurodov Xalqaro press klubning bugun, 6-fevral kuni bo‘lib o‘tgan sessiyasida ma’lum qildi, deb xabar berdi “Daryo” muxbiri Sevara Nishonova.
“Bankning eng muhim vazifalaridan biri sifatida eksportni rivojlantirish belgilangan. Shuningdek, bank eksportni moliyaviy qo‘llab-quvvatlash, eksport qilish uchun iqtisodiy shart-sharoitlar yaratish bilan shug‘ullanadi. Ushbu maqsadlar uchun Prezident tomonidan 500 million dollar mablag‘ ajratiladi. Bu eng avvalo eksport salohiyatiga ega bo‘lsa-da, eksportga imkoniyat bermayotgan moliyaviy to‘siqlarga barham berishni ko‘zda tutadi. Logistika masalalari, mahsulot saqlaydigan omborlar tashkil etish kabi ishlarga mana shu mablag‘larni yo‘naltiramiz”, — deydi Markaziy bank boshqaruv raisi.
Savdo-sanoat palatasi raisi Adham Ikromov bugungi kunda eksport bilan shug‘ullanuvchi tadbirkorlar duch kelayotgan muammolar haqida gapirib o‘tdi.
“Eksport bir necha masalalarga bog‘liq. Hozir tadbirkorni qiynaydigan masala bu — bojxona tariflarini tartibga solish masalasi. Demak, biz o‘zimizning ichki bozorimizda faoliyat yuritadigan tadbirkorni ham himoya qilishimiz kerak. Lekin shu bilan birga tashqi bozorlarni topish uchun bizga yangi texnologiya kerak.
Hozirgi kunda xorijiy investorlarga katta imkoniyatlar yaratilgan. Biroq bojxona tariflarini tartibga solish masalasi tufayli tadbirkorlar chet eldan asbob-uskunalarni olib kirishda ayrim byurokratik to‘siqlarga duch kelmoqda. Bu borada o‘tgan yili bizning Call-markazimizga 47 mingta murojaatlar bo‘ldi. Yanvar oyida esa 3325 ta muammoli murojaatlar qabul qilingan. Shu murojaatlarning 20 foizi eksport masalasida bo‘lgan”.
