Ektor Kuper: Futbolchilarda asabiy holat kuzatildi

Osiyo Kubogi 1-turidan o‘rin olgan O‘zbekiston—Ummon (2:1) uchrashuvidan so‘ng argentinalik mutaxassis Ektor Kuper jurnalistlarning savollariga javob qaytardi.

O‘yin haqida

— Uzoq kutilgan o‘yinni o‘tkazdik va g‘alaba qozondik. Natijadan barcha xursand. Ummon men kutganga nisbatan birmuncha kuchliroq ko‘rindi. Bu kabi tezkor va hujumkor o‘yin ko‘rsatishini kutmagandim ochig‘i. Menimcha, har ikkala taym ikki xil ko‘rinishda bo‘ldi. Birinchi bo‘limda biz yaxshiroq o‘ynadik. Ikkinchi taymda esa jamoa bo‘shashdi. Natijada o‘yin tenglashdi. Ammo uchrashuv so‘nggida omad biz tomonda bo‘ldi va g‘alabani tantana qildik. Muhimi startni a’lo kayfiyat bilan boshladik.

Ikkinchi bo‘limdagi chuqur himoyaviy o‘yin haqida

— Aynan shunday ko‘rsatma berganim yo‘q. Men jamoadan ko‘proq to‘p bilan muomala qilib, o‘yinni nazorat qilishni ta’kidlagandim. Lekin Ummonning tanaffusdan keyingi o‘yini ko‘p narsani o‘zgartirib yubordi. Shuning natijasida himoyalanishga majbur bo‘ldik.

O‘yinchilarning holati haqida

— Futbolchilarimiz charchagan edi deya olmayman. Lekin ularda asabiy holat kuzatildi. Shu boisdan ham sizga tetik emasdek ko‘ringan bo‘lishi mumkin.

Futbolchilarning indvidiual holati haqida

— Men doim jamoaviy o‘yinga e’tibor qarataman. Alohida futbolchilarni yoki ularning individual harakatlarini tahlil qilmayman. Ular bilan yakkama-yakka gaplashib, ba’zi narsalarni muhokama qilishim mumkin. Lekin futbolchilarga alohida baho bermayman.

Ektor Kuper, O‘zbekiston terma jamoasi bosh murabbiyi