Niderlandiyada prokuratura birinchi marta sudga evtanaziya o‘tkazish qoidalarini buzgan shifokorga qarshi ishni oshirdi, deb yozadi Meduza. Bu evtanaziya 2002-yilda qonuniylashtirilganidan buyon birinchi shunday ayblovdir.

Bunda gap 2016-yilda qariyalar uyida yashagan va demensiyaga chalingan 74 yoshli ayolning evtanaziya qilinishi haqida bormoqda.

Prokuratura fikricha, shifokorda evtanaziya o‘tkazish uchun yetarlicha asoslar bo‘lmagan, chunki bemor ayol tomonidan o‘z o‘limidan bir necha yil avval evtanaziya haqida so‘rab yozilgan hujjat “mujmal va qarama-qarshi gaplarga to‘la bo‘lgan”. Bundan tashqari, ayol vaqti-vaqti bilan o‘zining o‘lish istagi haqida ham, buning aksi haqida ham gapirgan.

“Prokuratura fikricha, shifokor ayol bilan u o‘lishni istash-istamasligi haqida gaplashib olishi kerak edi. Uning demensiyaga chalinganligi buni o‘zgartirmaydi”, — deyiladi bayonotda.

Ismi oshkor qilinmayotgan shifokor jurnalistlarga ehtiyotkorlik bilan ish ko‘rganligini va jinoiy ta’qibga tushib qolganidan afsusda ekanligini aytgan.