Shavkat Mirziyoyev Toshkent shahrining Shayxontohur tumani, “Kamolon” mahallasida qurilayotgan ko‘p qavatli uylarni borib ko‘rdi. Bu haqda Prezident matbuot xizmati ma’lum qildi.

Foto: Prezident matbuot xizmati

Davlat tomonidan ijodkorlarni qo‘llab-quvvatlashga qaratilayotgan e’tibor natijasida Milliy bog‘ yonidagi so‘lim maskanda Adiblar xiyoboni, Yozuvchilar uyushmasining yangi binosi barpo etilgan edi. Ushbu xiyobon ro‘parasida qurilayotgan mazkur uy-joylar yozuvchi va shoirlarga beriladi.

Foto: Prezident matbuot xizmati

Uyning birinchi qavatida 60 o‘rinli maktabgacha ta’lim muassasasi va oilaviy poliklinika tashkil etiladi.

Shavkat Mirziyoyev qurib bitkazilgan xonadonlardan birini va maktabgacha ta’lim muassasasini kirib ko‘rdi. Oilalarning tinch-farovon yashashi, bolalarning barkamol bo‘lib ulg‘ayishi uchun zarur sharoitlarni yaratish bo‘yicha topshiriqlar berdi.

Foto: Prezident matbuot xizmati

Shu yerda Toshkent shahri tumanlarida zamonaviy turar joy majmualari, ishbilarmonlik markazlari, dam olish maskanlari va sayilgohlar qurish, jamoat transporti xizmatini yaxshilash bo‘yicha loyihalar taqdimoti o‘tkazildi.

Foto: Prezident matbuot xizmati

Davlat rahbari mutasaddilarga loyihalarni takomillashtirish bo‘yicha ko‘rsatmalar berdi.