Yer sayyorasining mobil aloqa yetib bormagan 10 hududi (foto)

Dunyoda shunday hududlar borki, u yerda na qo‘ng‘iroq qilish, na internetdan foydalanish imkoniyati mavjud. “Billionnews.ru” internet-nashri dunyoda umuman telefon aloqasi mavjud bo‘lmagan 10 ta joy nomini e’lon qildi.

Kifuka, Kongo Demokratik Respublikasi

Kifuka — dunyodagi eng xavfli hududlardan biri. Statistika ma’lumotlariga ko‘ra, yiliga bir kvadrat kilometrga 158 ta yashin zarbasi kelib uriladi. Shunga ko‘ra, har qanday elektron qurilmadan foydalanishni o‘z joniga qasd qilish bilan tenglashtirish mumkin.

Grin Benk, AQSh, G‘arbiy Virjiniya

Grin Benkda dunyodagi eng katta teleskop joylashgan, uning vazifasi kosmosdan keladigan eng zaif signallarni tutishdan iborat. Shuning uchun hududda o‘zidan elektromagnit nurlarini taratuvchi har qanday qurilmani ishlatish taqiqlanadi. Bunday qurilmalar ro‘yxatiga esa telefon aloqasi, Wi-Fi tamog‘i va hatto radio ham kiradi.

Motuo, Xitoy Xalq Respublikasi

Motuo Tibet hududida joylashgan bo‘lib, mahalliy buddaviylar bu joyni muqaddas hisoblashadi. Motuoga ko‘tarilish juda ham qiyin. U yerga borish uchun 200 metr uzunlikdagi osmako‘prikdan o‘tishga har kimning ham yuragi dosh bermaydi. Shu ko‘prik tufayli ham bu hududda aholi yashamaydi va bu yerda aloqa vositalarning ishlashi g‘alati holat bo‘lgan bo‘lar edi.

Muli, Farer orollari

Oldindan aytib bo‘lmaydigan noqulay ob-havo sharoitiga ega hududda, hayot kechirish uchun zarur bo‘ladigan resurslar deyarli mavjud emas. Mulida atigi 4 nafar mahalliy aholi bo‘lib, bunday og‘ir sharoit ham ularga hududni tashlab ketishlariga ta’sir o‘tkaza olmaydi. Hududda turizmdan so‘z ochishning imkoni yo‘q, shuning uchun Mulini tashlandiq joy deb ham atasa bo‘ladi. Telekommunikatsiya haqida esa gap bo‘lishi mumkin emas.

Pitkern oroli, Tinch okeani

Pitkernning aholisi bor yo‘g‘i ellik kishidan iborat. Bu yerda sivilizatsiya bilan bog‘liq deyarli hech narsa yo‘q. Shu jumladan, telefon aloqasi va internet Pitkernda umuman mavjud emas. Aholi tashqi dunyo bilan faqatgina hududga bir oyda bir martda keladigan kema orqali aloqaga chiqishi mumkin.

“Akademik Vernadskiy” stansiyasi, Galindez oroli, Antarktika

Ukrainaning Antarktikadagi yagona ilmiy-tadqiqot stansiyasi. Tashqi dunyo bilan aloqa faqat sun’iy yo‘ldosh orqali amalga oshiriladi. Stansiyada internet mavjud, biroq uning tezligi ba’zida pochta orqali elektron xabarlarni yuborishga ham yetmaydi.

Vayau Laut, Filippin

Mahalliy aholi umrining ko‘p qismini suv ustida o‘tkazgani uchun “dengiz lo‘lilari” nomi bilan yuritiladi. Ular kamdan kam qirg‘oqqa tushishadi. Vayau Laut  yashash uchun eng yaroqsiz bo‘lgan hududlar ro‘yxatiga kiradi. Bu yerda na ichimlik suvi, na elektr energiyasi va na tashqi dunyo bilan aloqa bor. Lekin shunday sharoitda ham hayot kechira olayotgan aholiga faqatgina tasanno deyish mumkin.

Sokotra oroli, Hind okeani

Orol tashqi dunyodan butunlay himoyalangani uchun “Yerdagi begona hudud” nomi bilan ataladi.  Bu yerda g‘aroyib va noyob o‘simliklarni uchratish mumkin. Mobil aloqa va internet yo‘qligiga qaramay, Sokotrada 42 mingga yaqin aholi istiqomat qiladi.

Oymakon, Yoqutiston

Dunyoda aholi yashaydigan eng sovuq hudud Oymakon qishlog‘i hisoblanadi. Hududdagi eng sovuq harorat -71°С deb ro‘yxatga olingan. Bunday sovuq haroratda deyarli hamma narsa muzlab qoladi. Mobil aloqa yoki internetning bunaqa haroratda ishlay olishini esa tasavvur qilish imkonsiz. Aholi tashqi dunyo bilan faqatgina yoz faslida, haftada bir marta keladigan samolyot orqali aloqa qilishi mumkin.

Gorai, Hindiston

Faqat mulohaza yuritish va ichki xotirjamlikka erishish maqsadida barpo etilgan qishloqcha Gorai hisoblanadi. Goraiga telefon, planshet va shu kabi gadjetlar bilan kirishga ruxsat berilmaydi. Telefonda suhbatlashilmaganligi tufayli ham bu yerga aloqa xizmati yetib kelmagan. Goraiga qadam qo‘ygan inson hududda o‘rnatilgan qonun-qoidalarga so‘zsiz amal qilishi shart. Vaqtida uxlash, ovqatlanish, dam olish va mulohaza qilish hududning asosiy tartib qoidasi hisoblanadi. Bunday tartib-qoida kimga ham yoqmaydi!?

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.