Yoshlar ittifoqi eng yaxshi kitobxonlarga Spark sovg‘a qiladi

O‘zbekiston yoshlar ittifoqi kitob o‘qigan yoshlarni rag‘batlantirishning o‘ziga xos usulini topdi, deb xabar beradi Uz24.

G‘oyaga ko‘ra, eng ko‘p kitob o‘qigan yoshlar avtomobil bilan rag‘batlantiriladi. Bu haqda Nukus shahrida bo‘lib o‘tgan “Yoshlar poyezdi” targ‘ibot aksiyasi davomida Yoshlar ittifoqi Markaziy Kengashi mas’ul xodimi Abdulla Aslanov ma’lum qildi.

“Biz kitob o‘qigan yoshlarni rag‘batlantirishning o‘ziga xos usulini joriy qilyapmiz. Ya’ni kitob o‘qigan yoshlar Spark minadi! Xabaringiz bor, kitobxonlik ko‘nikmasini shakllantirish borasida mamlakatimizda bir qator chora-tadbirlar amalga oshirilishi kutilmoqda. Ular orasida ‘Eng yaxshi kitobxon oila’, ‘Eng yaxshi kitobxon maktab’, ‘Eng yaxshi kitobxon mahalla’ kabi loyihalarimiz g‘oliblariga avtomobil va boshqa qimmatbaho sovg‘alar taqdim etishni rejalashtirganmiz”, — dedi u.