Diyego Kostaning noaniq penaltisi sabab APL 23-turida to‘rt yetakchi klubning hammasi ochko yo‘qotdi

Futbol bo‘yicha Angliya Premyer-ligasining 23-turi 1-fevral kuni tunda bo‘lib o‘tadigan uch uchrashuv bilan o‘z yakuniga yetadi. 31-yanvar kuni 7 ta bellashuv bo‘lib o‘tdi.

Markaziy o‘yin chempionlik uchun kurash olib borayotgan “Liverpul” va “Chelsi” klublari o‘rtasida kechib, unda g‘olib aniqlanmadi — 1:1. To‘qnashuv asosiy vaqti yakuniga 15 daqiqa qolganida Diyego Kosta penaltidan aniq foydalana olmay, London klubining ochko yo‘qotishiga sababchi bo‘ldi. Qayd etish kerak, tomonlarning “Stemford Bridj” stadionida bo‘lib o‘tgan dastlabki o‘yinida Yurgen Klopp boshqaruvidagi “Liverpul” 2:1 hisobida zafar quchgandi.

O‘zining so‘nggi o‘yinini Angliya kubogi doirasida o‘tkazib, “Sautgempton” darvozasiga javobsiz 5 ta gol urgan Londonning “Arsenal” klubi APL 23-turini o‘z maydonidagi mag‘lubiyat bilan yakunladi. Arsen Venger muxlislar qatorida kuzatgan o‘yin “Uotford”ning 2:1 hisobidagi g‘alabasi bilan intixo topdi.

Londonning boshqa bir klubi “Tottenhem” ligada so‘nggi o‘rinni egallab turgan “Sanderlend”ni taslim qila olmadi — 0:0. Qo‘lga kiritilgan 1 ochko Devid Moyes murabbiylik qilayotgan “Sanderlend”ni bir pog‘ona yuqoriga olib chiqdi.

Bugun Manchester shahri klublarida to‘rt yetakchiga yaqinlashib olish uchun yaxshi imkoniyat bor. “Siti” Londonda “Vest Hem”ga qarshi saf tortsa, “Yunayted” o‘z maydonida so‘nggi o‘rindagi “Xall Siti”ni qabul qiladi. “Yo‘lbarslar” o‘tgan hafta Joze Mourinyo jamoasining mag‘lubiyatsiz seriyasiga yakun yasab bergandi.

Angliya Premyer-ligasi 23-tur bellashuvlari 31-yanvar, seshanba

“Arsenal” — “Uotford” 1:2

“Byornli” — “Lester” 1:0

“Bornmut” — “Kristal Pelas” 0:2

“Midlsbro” — “Vest Bromvich” 1:1

“Sanderlend” — “Tottenhem” 0:0

“Suonsi” — “Sautgempton” 2:1

“Liverpul” — “Chelsi” 1:1

1-fevral, chorshanba“Vest Hem” — “Manchester Siti”“Manchester Yunayted” — “Xall Siti”“Stok Siti” — “Everton”