Pokistonlik Gerkules: U nonushtaga 36 ta tuxumni paqqos tushiradi, kuniga 3 kg go‘sht yeb, 5 litr sut ichadi

Vazni 430 kilogramm bo‘lgan pokistonlik Arbob Hizr Hayot o‘zini dunyoning eng kuchli odami deb e’lon qildi va, ayni vaqtda, zamonaviy Gerkules sifatida tarixda nom qoldirish istagini bildirdi. Bu haqda Daily Mail xabar bermoqda.

25 yoshli Hayot restling bilan professional tarzda shug‘ullanmoqchi va pauerliftingda chempion bo‘lmoqchi. Uning qayd etishicha, u bir kun kelib bu niyatlariga albatta erishadi.

Marvel komikslari qahramoni sharafiga vatandoshlari tomonidan Xalk deb ta’riflangan Hayot hozirgidek tana ko‘rinishiga ega ekanligi uchun shukrona aytadi va yanada og‘irroq bo‘lishni xohlaydi.

Buning uchun u har kuni 10 ming kilokaloriyaga teng yegulik tanovul qiladi: xususan, nonushtaga 36 ta tuxumni paqqos tushiradi, kun bo‘yi esa 3 kilogrammdan ortiq go‘sht va 5 litr atrofida sut iste’mol qiladi.

Hayotning bo‘yi 190 santimetrni tashkil qiladi. O‘zining aytishicha, u tanasi bilan bog‘liq hech qanday muammolarni his qilmaydi.

Hozirgi kunda rasman amerikalik Brayan Shou jahonning eng kuchli odami hisoblanadi. Jahonning eng kuchli odami har yili World’s Strongest Man musobaqasida aniqlanadi.

Jahondagi vazni eng og‘ir odam esa saudiyalik Xolid bin Muhsin Sha’riydir. Uning vazni 610 kilogrammga teng.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.