Dunyodagi eng kichik delfin davlat himoyasiga olindi

Dunyodagi eng kichik delfin (Vaquita) Xalqaro kit ovi komissiyasi yig‘ilishida qabul qilingan choralar tufayli qirilib ketishdan saqlanishi mumkin. Bu haqda National Geographic xabar bermoqda.

Mazkur jonivorlarga hech qachon ov qilinmagani va uning mavjudligi 1985-yili maxsus tadqiqotlar chog‘idagina tasdiqlanganiga qaramay, ularning soni borgan sari kamayib bormoqda. Faqat Kaliforniya bo‘g‘ozida istiqomat qiladigan va 1997-yili 567 ta bo‘lgan delfindan bugungi kunga kelib atigi 59 ta qoldi. 

Bunga jonivorlarning Xitoy xalq tibbiyotida keng qo‘llaniladigan totoaba balig‘ini ovlash bilan shug‘ullanadigan brakonyerlar to‘riga tushib qolayotgani sabab bo‘lmoqda. Yangi choralar Meksika hukumatini “dengiz pandalari” nomi bilan ham mashhur bo‘lgan Vaquita istiqomat qiladigan hududlarda baliq ovi man etilishini ta’minlashga undaydi. Shuningdek, rasmiylar qirilib ketish arafasida turgan totoaba balig‘i noqonuniy tutilishiga ham chek qo‘yishni zimmasiga oldi.