Denis Istominni Rio—2016 da mag‘lub etgan Rafael Nadal dopingdan foydalangan bo‘lishi mumkinligi aytildi

Xalqaro antidoping tashkilotining ma’lumotlar bazasini buzib kirishga muvaffaq bo‘lgan Fancy Bears xakerlik guruhi Rio—2016 Olimpiadasida doping test na’munasi ijobiy chiqqan yana 26 nafar sportchi nomini oshkor qildi, deb yozdi “Olamsport”.

26 nafar sportchi 10 mamlakatga tegishli ekani aytilgan. Ular orasida ispaniyalik tennischi Rafael Nadal nomi ham bor.

Nadal Rio—2016 Olimpiadasining birinchi bosqichida O‘zbekistonning yetakchi raketkasi Denis Istominni mag‘lub etishga muvaffaq bo‘lgandi.

Xakerlar guruhi bosqichma-bosqich oshkor etib kelayotgan sportchilarning chindan ham dopingdan foydalangani antidoping tashkiloti tomonidan rasman ma’lum qilinmagan bo‘lib, bunday holatlar sirligicha qolib ketishining ehtimoli ham bor edi. Fancy Bears guruhi a’zolari esa bunday ma’lumotlarni butun dunyo bilishini istab, qo‘lga kiritilgan axborotni bosqichma-bosqich oshkor qilib kelmoqda.