Afina shahridagi Harbiy yutuqlar muzeyida O‘zbekistonning Gretsiyadagi Bosh konsulligi tomonidan O‘zbekiston—Gretsiya madaniy va ishbilarmon hamkorlik markazi bilan hamkorlikda Navro‘z bayramini nishonlash doirasida ilmiy konferensiya va fotoko‘rgazma tashkil etildi. Bu haqda “Daryo”ning shtatdan tashqari muxbiri Shuhrat Oripov xabar berdi.
Tadbirda Gretsiya siyosiy doiralari, jamoatchilik, diniy soha vakillari, ishbilarmonlar, shuningdek, OAV xodimlari ishtirok etdi. Mehmonlarning umumiy soni 500 kishini tashkil etdi.
Tadbir doirasida o‘tkazilgan ilmiy konferensiya Navro‘z bayrami, o‘zbek xalqining urf-odat va an’analari, tarixi va madaniyatiga bag‘ishlandi. Asosiy ma’ruzachilar Markaziy Osiyo bo‘yicha yetakchi ekspert, sobiq grek diplomati, yozuvchi Marianna Yatropolu Teoxaridu, Parij universitetining tarix bo‘yicha professori Potitsa Grigoraku, shuningdek, Bosh konsullik vakillari bo‘ldi. M.Yatropolu Teoxaridu o‘z chiqishida Navro‘zning kelib chiqishi tarixi va uning o‘zbek xalqi uchun ahamiyati haqida to‘xtaldi.
O‘zbekiston Respublikasining turistik salohiyati taqdimoti mehmonlarda alohida qiziqish uyg‘otdi. Tadbir ishtirokchilarida O‘zbekistondagi Navro‘z bayrami, o‘zbek xalqining an’ana va urf-odatlari, boy madaniyati haqidagi ma’lumotlar katta qiziqish uyg‘otdi. Navro‘z ayyomini nishonlash doirasida O‘zbekiston turistik brendini ommalashtirish maqsadida “O‘zbekiston grek sayyohlari nigohida” deb nomlangan fotoko‘rgazma tashkil qilindi. Ko‘rgazma tomoshabinlarda katta qiziqish uyg‘otdi.
Izoh (0)