NATO va Britaniya kengashi ukrainalik harbiylarga ingliz tilini bepul o‘rgatadi

Britaniya kengashi NATO bilan hamkorlikda Ukrainadagi sobiq harbiylarga ingliz tilini o‘rgatish bo‘yicha loyihani davom ettiradi. Bu haqda “Yevropeyskaya pravda” xabar bermoqda.

Mazkur loyihada Ukraina Qurolli kuchlari, Milliy gvardiyasi, Xavfsizlik xizmati yoki Davlat chegara xizmatida rasmiy xizmatni o‘tagan va so‘nggi uch yil davomida zaxiraga chiqarilgan yoki 2015—2016-yillarda zaxiraga chiqmoqchi bo‘lgan hamda til kurslarida o‘qish uchun vaqt ajrata oladigan harbiy xizmatchilar qatnashishi mumkin.

Bundan tashqari, mazkur loyihaga nomlari zikr etilgan tuzilmalardan 10 yil avval iste’foga chiqarilgan, biroq Ukraina sharqida davom etayotgan aksilterror operatsiyasi uchun safarbar etilgan sobiq harbiylar ham taklif etiladi. Harbiylar uchun mo‘ljallangan bepul til kurslari Kiyev, Xarkov, Odessa va Lvov shaharlarida noyabrdan boshlanadi.