O‘zbekiston gandbol federatsiyasi uchun 2014-yil katta muvaffaqiyat bilan yakunlandi. Uzbekistan Today’ning xabar berishicha, mamlakatning ham erkaklar, ham ayollar gandbol terma jamoalari Janubi-Sharqiy Osiyo chempionatining final bosqichida mos ravishda Yaponiya va Xitoy jamoalarini mag‘lub etib, musobaqa g‘olibi bo‘ldi. Bu haqda “Stadion.uz” xabar bermoqda.
“Terma jamoalarimiz mahorati o‘sganligini mamnuniyat bilan ta’kidlab o‘tmoqchiman. So‘nggi vaqtlarda O‘zbekistonda gandbolga katta e’tibor berilmoqda, ko‘plab tashkil etilayotgan o‘quv-mashg‘ulot yig‘inlari sportchilarimizning yanada yuksakroq darajalarga ko‘tarilishlariga yordam bermoqda. Agar 2013-yilda biz g‘alabaga qiyinchilik bilan erishgan bo‘lsak, 2014-yilda esa buni sezilarli ustunlik bilan amalga oshirdik”, — dedi O‘zbekiston gandbol federatsiyasi bosh kotibi Ismoil Matholiqov.
Musobaqaning erkaklar o‘rtasidagi bahslarida 7 jamoa, ayollar o‘rtasidagi bahslarida esa 6 jamoa ishtirok etdi. O‘zbekistonning ikkala terma jamoasi ham eng murosasiz uchrashuvlarni mos ravishda Yaponiya va Xitoy termalariga qarshi o‘tkazdi.
2015-yilda O‘zbekiston gandbolchilari yanada yuksakroq marraga chiqish — Osiyo chempionatida g‘alaba qozonishni maqsad qilgan. Ma’lumot uchun, ushbu musobaqa 2016-yilgi Olimpiya o‘yinlariga saralash bosqichi vazifasini ham o‘taydi.
Izoh (0)