Эрон ва “Ҳизбуллоҳ” Исроилнинг шимоли ҳамда марказидаги шаҳарларни 150 дан ортиқ ракета билан ўққа тутди. Бу ҳақда Deutsche Welle хабар берди.
Исроил армияси 11 март кунги ракета ҳужумлари қайтарилганини маълум қилди. Ҳужумлар тахминан соат 20:00 атрофида бошланган. Исроилнинг шимолий ва марказий ҳудудларида ҳаво ҳужумидан огоҳлантирувчи сиреналар янграган. Ҳайфа шаҳрида ҳам дронлар учирилгани ҳақида огоҳлантирувчи сиреналар эшитилган. Ҳужум оқибатида камида икки киши жароҳатланган.
“Операция Исроил ҳудудидаги 50 дан ортиқ нишонларга, жумладан, Исроилнинг Ҳайфа, Тель Авив ва Бершеба шаҳарларидаги ҳарбий базаларига қаратилган”, дейилади “Ҳизбуллоҳ” баёнотида.
Шунингдек, Ливан билан чегарадан беш километр масофадаги аҳоли пунктлари ҳам ўққа тутилган. “Ҳизбуллоҳ” бу ҳудудлар аҳолиси эвакуация қилиниши кераклигини таъкидлади.
Исроил “Ҳизбуллоҳ” ҳужумига жавобан Байрутга зарба берди
“Ҳизбуллоҳ”нинг Исроилга қилган ракета ҳужуми Исроил ва Эрон ўртасидаги уруш бошланганидан бери энг йириги бўлди. Ушбу можарода Ливан гуруҳи Теҳронни қўллаб-қувватламоқда.
Ҳужумдан кўп ўтмай, Исроил Байрутдаги объектларга, хусусан, “Ҳизбуллоҳ”нинг таянчи ҳисобланган Даҳия туманига авиазарбалар берди. Исроил бу ҳужумларда гуруҳнинг 10 та штаб-квартираси ва ракета учириш қурилмалари йўқ қилинганини таъкидлади.
