Самарқанд вилояти Паст Дарғом туманида 21 май куни автосервисда ёнғин содир бўлди. Бу ҳақда вилоят Фавқулодда вазиятлар бошқармаси хабар қилди.
Қайд этилишича, шу куни соат 13:13 да Паст Дарғом тумани «Қоратерак» маҳалласи ҳудудидан ўтувчи Самарқанд—Каттақўрғон автомобиль йўлида жойлашган «Осойиш» МЧЖга қарашли автомобилларга техник хизмат кўрсатиш устахонасида ёнғин содир бўлаётгани тўғрисида туман ФВБга хабар келиб тушган.
Воқеа жойига 3 та ёнғин-қутқарув экипажи жалб этилган. Улар ёнғин ҳудудига соат 13:20 да етиб борган ва соат 14:19 да ҳолат тўлиқ бартараф этилган.
Ёнғинда устахонанинг тахминан 80 квадрат/метр майдонда шифт, том қисми ва устахона ичида бўлган Lacetti автомашинасининг салон қисми ҳамда «Ваз-2106» автомашинасининг шина, мотор ва салон қисми ёниб, зарарланган. Ҳодиса оқибатида ҳалок бўлган ва жабрланганлар йўқ.
Ҳозирда терговга қадар текшириш ишлари олиб борилмоқда.
Аввалроқ Сирдарёда масжид ҳовлисида ёнғин юзага келгани, Тошкентдаги Nest One қурилиш биносида ёнғин чиққани, Самарқандда мусиқа мактабида ёнғин содир бўлгани хабар қилинганди. Мавзуга доир:
