Dubay politsiyasi 25 million dollarlik noyob pushti olmosni o‘g‘irlagan jinoyatchilarni atigi 8 soat ichida sun’iy intellekt yordamida qo‘lga oldi. Bu haqda Al Arabiya xabar berdi.
Politsiyaning aytishicha, Yevropadan olmos olib kelgan savdogar jinoyatchilar tomonidan villaga chaqirilgan. Savdogar kelgach, tosh qo‘lga kiritilgan va o‘g‘irlangan. Oradan ko‘p o‘tmay, 3 nafar gumondor Dubay politsiyasining maxsus guruhlari va sun’iy intellekt yordamida ushlangan. Ularning barchasi Osiyo davlatlaridan ekani aytilmoqda.
Ma’lumot o‘rnida, Dubay dunyodagi eng yirik olmos savdo markazlaridan biri hisoblanadi. BAA esa o‘z navbatida mamlakatdagi xavfsizlik va barqarorlik darajasi bilan faxrlanadi.
Sun’iy intellekt hayotning turli jabhalarida insonlarga ko‘mak berib kelmoqda. Xususan, ushbu texnologiya yordamida nafaqat politsiya, balki boshqa soha vakillarining ham ishi osonlashmoqda. Oldinroq Italiyaning Piyedmont okrugida bir yilga yaqin vaqt davomida bedarak yo‘qolgan 64 yoshli shifokor Nikola Ivaldoning jasadi sun’iy intellekt yordamida topilgani xabar qilingandi.
Italiya Milliy Alp va g‘or qutqaruv xizmati 1 yil davomida Nikola Ivaldoni qidiruv ishlarini olib borgan. Ammo an’anaviy qidiruv usullari natija bermagach, jarayonga zamonaviy dronlar jalb qilingan. 2 ta dron 29-iyul kuni 5 soat mobaynida Piyedmont okrugidagi o‘rmon hududlarini kuzatgan. So‘ngra qutqaruvchilar bu tasvirlarni SIga yuklagan va natijada texnologiya darhol “shubhali nuqtalar”ni aniqlab, jasad joylashgan hududni topib bergan edi.
Izoh (0)