Italiyaning Piyedmont okrugida bir yilga yaqin vaqt davomida bedarak yo‘qolgan 64 yoshli shifokor Nikola Ivaldoning jasadi sun’iy intellekt yordamida topildi. Bu haqda NDTV xabar berdi.
Ma’lum qilinishicha, Italiya Milliy Alp va g‘or qutqaruv xizmati 1 yil davomida Nikola Ivaldoni qidiruv ishlarini olib borgan. Ammo an’anaviy qidiruv usullari natija bermagach, jarayonga zamonaviy dronlar jalb qilingan. 2 ta dron 29-iyul kuni 5 soat mobaynida Piyedmont okrugidagi o‘rmon hududlarini kuzatgan. So‘ngra qutqaruvchilar bu tasvirlarni SIga yuklagan va natijada darhol “shubhali nuqtalar” aniqlangan.
CNSAS droni uchuvchisi Saverio Isolaning aytishicha, SI tasvirlarda o‘zgacha rangdagi pikselni aniqlab, tog‘ haybati oldida juda kichik bo‘lib ko‘rinadigan marhumning dubulg‘asini topishga muvaffaq bo‘lgan. Yomg‘ir va tuman sabab qutqaruv ishlari kechikkan bo‘lsa-da, 31-iyul kuni jasad mutaxasislar va dronlar yordamida topilgan. Qutqaruvchilar fikricha, suratlarni ularning o‘zlari tahlil qilganida bu jarayon haftalar yoki oylarga cho‘zilishi mumkin edi. Isola bu haqda shunday fikr bildirgan:
“Bu inson yutug‘i, ammo texnologiyasiz bu muvaffaqiyatning imkoni bo‘lmasdi. Bu — jamoaviy g‘alaba”.
Bundan oldinroq SI shifokorlar e’tiborsiz qoldirgan ko‘krak saratoni holatlarining 30 foizini aniqlab bergani ma’lum qilingandi. SIning samaradorligini tekshirish uchun tadqiqotchilar 1,4 mingga yaqin tomografik tasvirlarni, shu jumladan shifokorlar e’tibor bermagan 224 ta o‘simtani tahlil qilgan. Natijada SI ularning 73 tasini to‘g‘ri aniqlagani ayon bo‘lgan — bu barcha o‘tkazib yuborilgan tashxislarning 32 foizini tashkil etadi.
Izoh (0)