Ўзбекистоннинг олтин-валюта захиралари салкам 2 млрд долларга ошди

Ўзбекистоннинг олтин-валюта захиралари икки ойлик пасайишдан кейин март ойида кўтарилди. Бу ҳақда Марказий банк маълумотларида келтирилган.

Қайд этилишича, 1 март ҳолатига кўра, мамлакат олтин-валюта захиралари ҳажми 34,19 миллиард долларни ташкил этган. Ўтган ойда халқаро активлар ҳажми 1,99 миллиард долларга ошиб, 2023 йилнинг дастлабки икки ойидаги пасайишни деярли қоплаган.

Хорижий валютадаги активлар миқдори 8,26 миллиард долларни ташкил этиб, сўнгги йиллардаги энг паст кўрсаткичлардан бирида сақланиб қолган. Ўтган ойда уларнинг миқдори 710,7 миллион долларга ошган. Шунингдек, захирадаги олтиннинг физик ҳажми сезиларли даражада — бир ой олдинги 11,9 миллион трой унциядан (370 тонна) 11,5 миллион трой унцияга (357,69 тонна) камайган.

Статистика агентлиги февралдаги олтин сотуви республиканинг январь—февраль ойларидаги жами экспортининг 36,3 фоизини ташкил этганини маълум қилганди. Республика 2023 йил январда 1,2 миллиард долларлик олтин экспорт қилган. Жорий йил январда эса олтин сотилмаган. Ўзбекистон Марказий банки жорий йилнинг февраль ойида 12 тонна олтин сотиб, бу даврда қиммат металл сотуви бўйича дунёда биринчи ўринга чиққан. 

Олтин захиралари нима учун керак?

Оддий тил билан айтганда, бу суғурта, давлатнинг “хавфсизлик ёстиғи”. Захиралар дунёнинг деярли барча мамлакатларида фавқулодда вазиятлар учун мавжуд.

Захиралар одатда юқори ликвидли, яъни тез сотиладиган активларда сақланади. Олтин ва хорижий валюта ушбу талабларга жавоб беради — улардан исталган вақтда қарз тўлаш ёки инвестициялар учун фойдаланиш мумкин.