Ўзбекистонда фискал тартиб-қоидаларини бузганлик учун жарима миқдори камайтирилганди. Солиқ кодексига тегишли ўзгартириш киритиш тўғрисидаги қонун лойиҳаси қабул қилинди.
Олий Мажлис Қонунчилик палатаси мажлисида “Ўзбекистон Республикаси Солиқ кодексининг 227-1-моддасига ўзгартириш киритиш тўғрисида”ги қонун лойиҳаси депутатлар томонидан қабул қилинди ва Сенатга юборилди.
Янги таҳрирдаги Конституцияда жазолар мутаносиблиги принципи акс эттирилиши муносабати билан солиқ қонунчилигини бузиш билан боғлиқ жавобгарликларни янада либераллаштириш зарурияти юзага келганлиги сабабли қонун лойиҳаси билан Солиқ кодексининг 227-1-моддаси бўйича жарима миқдори 50 бараварга камайтирилмоқда.
Яъни, эндиликда фискал белгиларни акс эттириш ёхуд автоматлаштирилган ҳисобга олиш ўлчов воситалари билан жиҳозлаш ёки солиқ органларининг ахборот тизимлари билан интеграция қилинишини таъминлаш бўйича қонунчиликда белгиланган талабларни ёки тартибни бузиш, шунингдек товарларни (маҳсулотларни) ишлаб чиқарувчилар, импорт қилувчилар ва сотувчилар томонидан идентификация воситалари орқали мажбурий рақамли маркировкалаш тартиб-қоидаларига оид ҳуқуқбузарликлар биринчи марта содир этилганда реализация амалга оширилган охирги ҳисобот чорагида олинган соф тушумнинг 2 фоизи миқдорида жарима солишга сабаб бўлиши белгиланмоқда.
“Тадбиркорлар у ёки бу сабабли маҳсулотни маркировкаламаган ёки дўконига автоматлаштирилган ҳисобга олиш ўлчов воситаларини ўрната олмаганда охирги ҳисобот чорагида эга бўлган соф тушумни жарима шаклида тўлашга мажбур бўлаётганди.
Қонун лойиҳаси билан Солиқ кодексига киритилаётган ўзгартиришга кўра, эндиликда фискал тартиб-қоидаларга оид ҳуқуқбузарликлар учун қўлланиладиган молиявий жарима миқдори қарийб 98 фоизга қисқартирилмоқда”, — дейди Қонунчилик палатаси спикери ўринбосари Одилжон Тожиев.
Худди шундай ҳуқуқбузарлик молиявий жазо чораси қўлланилганидан кейин бир йил давомида такрор содир этилган бўлса, реализация амалга оширилган охирги ҳисобот чорагида олинган соф тушумнинг 20 фоизи миқдорида жарима солишга сабаб бўлади.
Муҳокамалар давомида депутатларнинг таъкидлашича, қонун лойиҳасининг қабул қилиниши солиқ қонунчилигини бузганлик учун жавобгарликни янада либераллаштириш, солиққа оид ҳуқуқбузарликлар учун жавобгарлик чораларини адолатлилик тамойили асосида белгиланишига, ҳуқуқбузарликларнинг барвақт олди олинишига ҳамда тадбиркорлик субъектларига ортиқча харажатлар юкланмаслигига хизмат қилади.
Изоҳ (0)